Topico di cannabis a bira un piedra den sapato di gobierno
E echo cu e ley di e prome fase di e reforma fiscal no a conta cu e voto di e fraccion di RED den parlamento, prome minister Evelyn Wever- Croes no kier bay leu con esaki lo por afecta e coalicion di gobierno(MEP-POR-RED). E ta haya cu esun cu mester duda contesta ta e “doño di curpa.” Kiermen den e caso aki e unico parlamentario di e fraccion di RED, Ricardo Croes of e mesun minister Rudy Lampe.
El a laga sa cu durante e votacion di e presupuesto 2019 nan a conta cu e sosten di e fraccion di RED como partner di gobierno. E votacion tabata 12 na fabor y 8 den contra pasobra parlamentario di oposicion Richard Arends no tabata presente. “No por otro. Sr. Lampe ta representante di e partido den e coalicion den gobierno y e ta pa su presupuesto tambe,” el a bisa.
Reforma fiscal
Apesar cu e parlamentario Ricardo Croes a participa y brinda su sosten constantemente na e ley di reforma fiscal, pero na momento di e votacion e no tabata ey. E dia ey (diahuebs ultimo) e parlamentario di RED tabata presente den e prome tanda. Sinembargo despues e mester bandona parlamento pa atende un asunto familiar. “Nos ta compronde esaki. E tabata un cos serio…” premier Wever-Croes a declara dunando contesta na Bon Dia Aruba.
Sinembargo e prome mandatario Wever-Croes a duna su punto di bista bisando cu nan ta consciente di e reto cu un gobierno di coalicion entre tres partido ta trece cune. A tarda dos luna pa Aruba por haya su gobierno durante e proceso di formacion pa nan por yega na otro. Nan tabata tres grupo di hende cu nan propio ekipo politico, totalmente diferente na otro, y cu mester cuminsa conoce na otro. Pero tambe papia cu otro y dialogo cu otro.
E ta reconoce cu tin diferencia di opinion entre partidonan di coalicion y tambe denter di e partidonan den coalicion, manera tin diferencia di opinion den cualkier organisacion. E no ta haya importante e diferencia di opinion sino con nan lo por atende cu nan diferencianan di opinion. “Esey ta locual nos ta bin ta haciendo y esey ta locual nos ta sigui haci tambe,” el a declara.
Cannabis
Durante e tratamento di presupuesto 2019 tabatin enfasis di e fraccion di RED riba e topico di cannabis. E ta un topico cu ta birando keto bay e piedra den sapato di e gobierno di coalicion aki, particularmente cu RED.
A base di e mesun declaracion di minister presidente, RED ta haya cu gobierno no ta avansando lihe y suficiente riba legalisacion di cannabis pa uzo medicinal. Pero minister presidente ta di opinion cu berdad nan ta haciendo e proceso aki di un forma ‘minuciosamente cauteloso.’
E ta haya cu e asunto aki ta uno delicado ya cu tin un grupo grandi den comunidad cu ta preocupa pa e tema aki. E ta kere cu riba e punto aki ta e unico diferencia ya cu den esencia no tin un diferencia.
