IMF/WORLD BANK ta trece ‘BTW’ dilanti atrobe
Despues di e rechaso pa Prome Ministro Eman di e reforma fiscal cu ministro Bermudez kier a introduci, aparentemente nos ta ‘back to square one’ y lo bay dura basta tempo pa yega na un acuerdo nobo. A pesar di esaki, tin cierto cos no ta sucede pa casualidad. Ministro Bermudez tabatin expertonan di IMF/World Bank di bishita pa yuda clarifica den ki direccion nos por bay cu un reforma fiscal. Pasobra un reforma nos mester, riba esey no tin duda entre experto. Banda di esaki ta hunga un papel e necesidad urgente di gobierno pa aumenta entrada. Aunke publicamente no ta admiti esey, pero ultimo rapport di CAFT ta duna claramente di conoce cu tabata e acuerdo pa gara 50 miyon extra cu ABB.
Awor cu ABB ta parce ‘off the table’, lo mester bay contempla henter e panorama di reforma fiscal di nobo, implicando cu a corto plaso no lo tin un reforma fiscal, pero si lo por tin adaptacion menos drastico cu por haci diferencia. Si nos tira un bista riba e alternativanan cu tin awor mes, loke ta resalta ta un aumento di BBO, of un introduccion di e Bank Transfer Tax. Un aumento di BBO ta masha improbabel, ya cu aki e pasado politico recien, unda a campaña cu abolicion di BBO, ta hunga un papel. Di otro banda, un Bank Transfer Tax lo por drenta na vigor na tur momento di aña, pero naturalmente lo conta cu oposicion fuerte di e banconan y di organisacionnan empresarial tambe.
Fuera di esey, tabatin ultimamente un encuentro organisa pa ‘Meldpunt Ongebruikelijke Transacties (MOT) unda a duna un bista riba e grado di cumplimento di Aruba cu exigencia y recomendacion di FATF (Financial Action Task Force) y su rama Caribense CFATF. Por bisa cu cierto trabao a ser haci, pero tin hopi punto cu te awor no a keda soluciona. Ehemplo di esaki ta e proceso di sancionamento mes di delito di labamento di placa y financiamento di terorismo, cu ta carece di credibilidad mayoritariamente pa motibo di falta di capacidad di operacion den e departamentonan cu mester haci esaki.
Tambe falta legislacion al caso, por ehemplo ainda no a yega na introduci e ‘Boek 2’ di nos Codigo Civil, cual ta trata derecho encuanto e personanan legal o huridico, manera e NV, VBA, AVV, pero tambe e fundacion y asociacion. Loke ta preocupante di un Bank Transfer Tax, cu esaki lo pone nos den un luz mas negativo ainda cerca FATF, pasobra nos lo pusha Aruba bek den un economia basa riba cash, loke ta aumenta e peligro di labamento di placa na luga di combati esey.
E urgencia pa bin cu medida adicional pa haya mas entrada a bira mas grandi awor cu a bira bisto cu entradanan di gobierno no ta aumenta segun e crecemento economico cu ta supone ta tumando luga den e aña aki.
Tocante e posibilidad di introduci un BTW (Belasting op Toegevoegde Waarde; Value Added Tax, VAT) cu a ser discuti atrobe durante e encuentro organisa pa ministro di Financia, por bisa cu esey ta un discusion bastante bieu cu lo ser hiba atrobe. Basicamente e opinionnan contra ta concentra riba e siguiente puntonan: 1) Un BTW ta complica pa maneha pa Servicio di Impuesto; en todo caso mas complica cu un BBO; 2) E mester tin un porcentahe bastante mas halto cu BBO, pa motibo cu ta aplica restitucion di e BTW cu a paga na nan supplier.
Di otro banda, esunnan na fabor di un BTW ta mustra riba e bentahanan: 1) ta haya informacion di esunnan cu a cobra di e empresario cu ta pidi restitucion, loke ta añadi na mehora cumplimento y ta haci menos necesario aumenta e tarifa; 2) pa motibo di restitucion BTW no tin e efecto acumulativo cu e BBO tin, asina causando menos inflacion.
Mester constata cu a pesar di su complehidad mayoria di pais, tambe varios chikito den nos region, a pasa pa maneha un BTW (VAT).
Naturalmente tin esunnan cu ta bisa cu miho nos keda cu loke nos tin, cu ta e BBO. Esey lo por tabata un opcion si ta asina cu politico “siña di kita nan man di e cos aki”. Un impuesto manera BBO por funciona si mantene e porcentahe abao y no cay den tentacion pa aumenta esey. E problema ta net cu ora e tin exito, mas e politico kier haci uzo di esaki pa trece placa aden y e cos ta bay robes. Tambe mester considera cu e BBO ta confronta problema serio di cumplimento. E empresario ta duna cuenta cu ken el a bende, pero no di ken el a cumpra. Esaki manera bisa anteriormente e BTW si ta diseña pa atende.
Manera cosnan ta mustra awor, lo tin amplio tempo pa hiba henter e discusion aki atrobe, inclusivo tambe e debate cu a termina na fabor di esunnan cu tabata pro “pa cobra na porta”, loke cu e ABB (na luga di invoerrechten) lo tabata e caso. Lamentablemente e pashent ey nunca a yega hospital.
