E proyecto di Isla di Oro a conoce un stop abrupto, sinembargo tin pensamento den cierto gruponan activista conectando e influencia cu interesnan priva ta eherce riba desaroyo di areanan na otro pais manera e Dakota Access Pipeline (DAPL) cu e fenomenonan comparabel na nos pais.
Reflexionando riba e lucha di activista cu un grupo di persona a hiba pa asina stop proyecto Isla di Oro, a organisa un ritual pa yena e area cu bon intencion, sperando cu den futuro e area di Isla di Oro lo no conoce otro posibel intervencion.
Durante e ritual, lidera pa un persona cu a conecta cu cultura indigena den Estados Unidos, palabranan y lenganan perdi a trece un yobida mientras un grupo di 7 persona tabata termina e ciclo di purificacion den forma di un wiel.
Durante un combersacion cu Bon Dia a tene cu e persona cu a lidera e ritual, el a expresa cu rond mundo culturanan indigena ta lantando poco poco despues di decadanan unda tabata purbando pa conecta bek cu nan cultura y tradicion. Manera mata jong di simiya morto, nan te hasta ta conectando na un nivel internacional y trans cultural.
E resistencia di banda di culturanan indigena por mira cu ta fuerte na Merca, unda e urgencia pa bringa pa nan ambiente te hasta ta toca nan derecho pa tin awa limpi pa bebe, manera por a mira cu e DAPL.
Presionnan economico/priva di e manera aki ta toca derechonan di naturalesa pero tambe humano. Sinembargo algo interesante cu a bin dilanti e combersacionnan aki tabata e manera e influencia aki tambe ta afecta personanan cu ta bringando contra di algo. Den caso di DAPL, por ehempel, por a mira cu cierto figuranan halto den tribunan ta haya sumanan di placa a cambio di complicidad pa no sigui publica y hala atencion na e desaroyo cu a afecta e acceso di awa pa cierto comunidadnan.
Aunke no ta conoci riba cua nivel of si interesnan priva a influencia organisacionnan no gubernamental (NGO’s) pa bay di acuerdo di e proyecto, den combersacion cu un di e activistanan a bin dilanti cu lo tabata posibel cu un tipo di omkoping a tuma luga si mira posicion di organisacionnan y habitantenan den area. Si esaki a tuma luga en berdad of no, sinembargo, no ta e aspecto mas importante.
E pregunta e ora ey mester keda, pa cierto activistanan, con den futuro por mantene un resistencia solido y constante contra interesnan di companianan stranhero of local pa desaroya sin tene consideracion cu naturalesa por medio di uza marketing inteligente pa haci mascarada di intencionnan.
Rapportnan entrega pa propio desaroyadonan
Algo importante cu ta influencia e aspecto aki ta e echo cu generalmente rapportnan di impacto riba medio ambiente ta traha pa e propio desaroyadonan cu interesnan economico, asina treciendo e riesgo cu nan lo por pinta un proyecto bunita, manteniendo e berdadero intencion te cu ta logra convence autoridadnan local pa otorga permisonan pa desaroyo.
Ademas di esaki tin e chens cu consehonan duna pa departamentonan manera Directie Natuur en Milieu (DNM) ta haya influencia di e esfera politico bou cual nan ta resorta, cual pa gran parti tin interes pa desaroya e proyecto. E activistanan ta haya cu mester tin un transparencia amplio no solamente entre interesnan priva y gobernacion, si no cu e propio habitantenan di un tera.
Aunke Isla di Oro lo keda manera cu e ta pa awo, bou cierto activistanan e pensamento ta reina cu e desaroyo di e area lo bira un topico bek den futuro.
