refineria ta domina debate (sh).jpg

Durante e tratamento di e presupuesto di Asuntonan di Reino den Tweede Kamer na Hulanda mayoria atencion a bay na e dos refinerianan na Aruba y Corsou. Parlamentarionan di PvdA, VVD, D66, PVV y SP a expresa nan preocupacionnan.

Manera Bon Dia Aruba a skirbi durante e inauguracion di Citgo diabierna pasa, e vice presidente Jesus Luongo di PDVSA como doño di Citgo a menciona Isla como un ehempel exitoso di colaboracion pa Aruba.

Sinembargo e politiconan Hulandes cu e experiencianan cu Isla na Corsou netamente ta haci cu nan ta preocupa riba e acuerdo  cu Citgo/PDVSA na Aruba. E parlamentario Roelof van Laar (PvdA) ta bisa tocante Aruba cu e politica a scoge pa un futuro menos limpi (berde). Cu e deal aki tampoco ta parce cu Aruba ta drechando su presupuesto, asina e ta expresa.

Parlamentario André Bosman tampoco a reacciona contento riba e parti financiero di e acuerdo. E ta haya cu e refineria a bira un ‘joke’ pe isla mes pero tambe internacional. Pasobra con por cu Aruba cu un debe di mas cu 80% GDP por duna un garantia na e operado di e refineria di mas cu 300 miyon dollar, e ta bisa. Segun Sr. Bosman esaki ta mustra mas tanto riba un gesto pa gana voto, di parti AVP pero tambe di MEP. E ultimo partido den oposicion tambe a voto pro e reapertura di e refineria. “Niun hende ta bay bisa no, pa asina no perde voto”, segun e politico di VVD. E unico parlamentario cu a vota contra e refineria, ta e parlamentario independiente Marisol Lopez Tromp.

E parlamentario Bosman hunto cu colega di SP, Ronald van Raak kier un garantia di nan gobierno cu Hulanda lo no para responsabel pa cualkier riesgo financiero.  PVV tambe a pidi esaki y e parlamentario di e partido aki, Sietse Fritsma tambe a haci un yamada pa kibra e relacion cu e islanan Caribense.

Conseho di CAft riba refineria
Den e debate tabatin preguntanan tambe pa minister di Asuntonan di Reino, Ronald Plasterk riba e funcionamento di Caft, si e organo por haci su trabou como cu gobierno di Aruba no ta suministra e informacion financiero necesario na tempo na e organo consultativo.

CAft lo duna un conseho tambe riba e refineria y e acuerdonan concerni. Lo spera esaki fin di e luna aki.

 

Denuncia asbest

Te ainda e habitantenan di Fort Heuvelstraat ta luchando contra e trabou y dump di asbest ilegal riba e tereno di refineria. Nan ta canando un caminda di cruz na diferente instancianan manera Departamento di  Medio Ambiente, DTI, brandweer y tambe polis. Dialuna e habitante Jaap de Vries a purba di haci un denuncio na  warda di San Nicolas atrobe. Y atrobe nan kier a mand’e pa otro instancianan. Finalmente el a logra di palabra e siguiente dia pa nan tuma su denuncia. Pero diamars e situacion a escala un poco pasobra recherche ta keda nenga su keho. Despues di intermediacion di Ministerio Publico e habitante a logra di haci aangifte finalmente.

Bon Dia Aruba sa di mas casonan (riba otro asuntonan) cu polis ta nenga di tuma aangifte di ciudadano riba echonan cu ta castigabel segun codigo penal. Esaki ta contra ley pasobra polis den casonan penal semper mester tuma e aangifte. Nos a menciona esaki tambe na e hefe di Ministerio Publico, e procureur-generaal (PG) y nos ta wardando riba un reaccion di polis y Ministerio Publico riba esaki.