Tur e turbulencia politico di e ultimo simannan ta kita atencion di asunto basico manera proximo tratamento di presupuesto. Nos no ta bay drenta ainda den e detayenan di e presupuesto pero ta para un rato keto na loke nos tin nos dilanti na cifra general unda nos por ta bay den e proximo par di aña.
Nos por mira bastante diferencia caba den e cifranan cu gobierno ta presenta pa su presupuesto, y loke ta e perspectivanan mas realistico cu nos por haya den e proyeccionnan di Banco Central. Specialmente e publicacion Economic Outlook cu a sali na september ultimo, ta papia idioma cla. Y di biaha CAFT ta recomenda gobierno pa revisa su proyeccionnan segun e ultimo mirada pa futuro aki di Banco Central. Nos no a mira nada ainda, por ta cu ta warda te ora cu presupuesto ta den parlamento, por ta tambe cu ta haya cu e calculacionnan di gobierno ta bon asina y no mester cambia nada.
En todo caso nos si ta tira un bista riba e discrepancianan aki, pa sa unda nos ta para. Pa cuminsa gobierno ta tuma como ‘base line’ cifranan demasiado optimista di unda economia di e aña aki ta para. Segun Banco Central, den e ultimo trimester di e aña aki e inversion den e refineria, si nan tuma luga e aña aki, no ta bay haci tanto diferencia pa e resultado final di 2016. Hasta cu un refineria cu ta cuminsa prepara, y ta emplea hende pa esey, nos economia ta bay atras e aña aki cu -1,3% di GDP nominal. Pero un desinflacion di -0,8% ta percura pa un aumento modera di 0,4% di GDP real. Esey ta si e inversionnan cuminsa core e aña aki caba.
Loke ta sumamente dudoso, pasobra no tin financiamento ainda y, manera ministro encarga cu energia mes a declara den parlamento, ta awor no mas Citgo ta bay ‘assess the damage’ den e refineria.
Cu esaki el a indica di un manera franco cu e inversion minimo lo ta alrededor di 650 miyon dollar, pero cu no sa cuanto e factura final ta bay ta. Henter e proceso di determina loke mester haci, pa bay simultaneamente busca financiamento y sigui cu e proceso di ‘tendering’ pa haya e companianan specialisa pa haci oferta, te pa bay dicidi riba esey, pa nan por cuminsa traha…
Mira asina, Pasco ta den porta caba prome cu bo por frega wowo, y esey por tin como consecuencia cu un gran parti di e personal cu mester pa e trabaonan di rehabilitacion no ta bay haya trabao e aña aki, sino pa mas tempran den curso di otro aña.
Y, manera Banco Central ta observa corectamente, e beneficio mayor den e fase inicial aki ta e empleo. Material pa gran mayoria lo ta cumpra den exterior y di mes caba e inversion inicial, calcula na Afl. 234 miyon lo bay tuma luga te den 2017. Pero en todo caso, hasta si cos bay bon e aña aki mes, nos economia ta bay atras considerablemente, te na un nivel di Afl. 4755 miyon, un caida di Afl. 93 miyon compara cu 2015. Kico tur esaki ta significa?
Cu gobierno mester bay revisa henter e proyeccion multi-anual cu nan a elabora pa CAFT, pa nan mes y pa nos tambe. Un vistazo den esaki. E cifranan di crecemento economico, manera Raad van Advies (RvA) tambe ta maneha nan, ta conta cu un GDP nominal pa 2016 di Afl. 5015.4 miyon, mas di Afl. 260 miyon mas cu e calculacion di Banco Central pa fin di e aña aki, cu ta apenas Afl. 4754,7 miyon, mas o menos e nivel di 2014. Segun gobierno, e cambio grandi positivo ta bin na 2017, ora ta spera cu GDP lo crece cu 6,1%, y den e añanan despues (2018 te 2020) cada biaha cu 2,4%, bao influencia di e inversionnan haci.
Esaki ta haci cu e punto di salida pa e proximo añanan ta completamente diferente, unda e aumento den inversion cu e upgrader ta bay ocasiona, apenas ta yuda nos recupera loke nos a perde recientemente.
Y tin algo mas. E retroceso cu Banco Central ta señala den sector di turismo talbes no ta alarmante, pero mester ta obheto di preocupacion si. Banco Central ta señala un tendencia negativo den e cifra di ‘receipts per tourism night’ desde 2014, y un tendencia negativo den tanto ADR como RevPar den prome mita di 2016, cu si nada cambia lo significa un retroceso di 5,3% di ADR y 5,8% den RevPar pa fin di 2016.
Kico ta e mensahe aki? Cu e inversionnan den e upgrader ta genera un empleo considerabel pa un tempo cortico, y despues lo baha bastante ora e planta cuminsa opera. E ta yuda, pero no ta haci milagro. Ta p’esey ta importante keda enfoca riba mantene sector di turismo optimal. No por enfoca solamente riba celebra reapertura, pero mester sigui presta atencion grandi na conserva y mehora e situacion di inversion y mehoracion di calidad den turismo. Esey ta keda e columna vertebral di nos economia.
