Sigur nos minister presidente a crea cierto claridad den su entrevista antayera cu e medio digital Noticiacla, cu sigur pa e empleadonan y nan famia mester a cay duro. Practicamente no tin perspectiva mas pa sigui colabora cu Citgo, tampoco awor cu e compania aki, o miho bisa e consorcio completo na Merca, actualmente ta dirigi pa hende di e presidente interino di Venezuela, Juan Guaido.

Esey no a trece cambio positivo cune, pero igualmente bao mando di e Chavistanan tampoco tabata mira avance den henter e proyecto. Y, aunke pa esnan cu te na ultimo tabatin speransa cu cos lo cambia pa miho, esaki realmente no por bin como sorpresa, mas bien e desilusion tabata pa tende e ultimo mensahe, cu a cay manera e simbolico espada.

E señalnan cu e proyecto aki tabatin su retonan, tabat’ey desde e momento cu a cera e acuerdo na palacio Miraflores. E dia siguiente e compania original cu e nomber Citgo, e compania Citgo Petroleum Corporation, a laga sa cu nan colaboracion lo ta limita na duna asistencia tecnico y explicitamente a menciona cu pa loke ta financiamento di e proyecto, pa cual nos a yega di tende diferente suma, di por lo menos US$ 650 miyon, esey lo mester a bin di financiamento externo. Cu hopi malabarismo e gabinete anterior a logra di camufla cu nunca realmente e proyecto tabatin bon perspectiva, pasobra gradualmente e situacion di Pdvsa a bira asina grave, cu actualmente henter nan infrastructura na Venezuela ta cay na pida, y nan no tin e capital pa drecha cos den cas, te pa nan tin placa pa drecha otro cos. Y mientras Venezuela a bira e nomber mas problematico den mundo financiero, e portanan a cera tambe pa por haya placa pa e transformacion di e refineria pa un upgrader. E situacion describi aki tabata existi aña pasa caba, y no a cambia pasobra e situacion na Venezuela no a haya solucion ainda.

Talvez cu e cambio di mando pa loke ta e grupo di empresa Citgo na Merca, cu desde algun luna ta den man di e grupo opositor lidera pa Juan Guaido, lo a duna speransa nobo, pero esey a resulta di no ta asina. Y prome cu cuminsa zundra cu nan no ta di confia o no ta di buena fe, ta importante pa evalua e posicion cu nan ta aden. Algun dato. Algun aña pasa Pdvsa y gobierno Venezolano a hipoteca Citgo te na su nek, dunando e accionnan di e compania como garantia na e grupo di inversionista cu a cumpra bono di Citgo, y di otro banda na e empersa Ruso Rosneft, cu a percura pa otro prestamo.Tur e biyones ey a bay para den man y saco di Maduro y su delincuentenan, lagando Citgo cu debe so. Mester bisa si cu e compania a sigui opera, y ta na e momento aki bastante bon para, aunke cu pa logra esaki siman pasa a haya un prestamo, cu pa un gran parti tabata pa restructura debe, pa kita e acreedornan di nan lomba.

E otro parti di e prestamo ta bay na mehora operacion di e infrastructura na Merca, y no tin nada contempla pa e proyecto na Aruba.

Malo pa Aruba, pero realmente nos por reprocha nan algo? Ta facil pa bisa cu Guaido y su hendenan a asumi responsabilidad y cu esey… tur responsabilidad, tambe esun di e proyecto na Aruba. Pero, esey no ta asina. E proyecto pa cual PDV Holding a firma na 2016, ta uno cu mester a bay Asamblea Nacional na Venezuela pa aprobacion. Y Maduro, cu tabata ignora e Asamblea Nacional completamente, y hasta a crea un asamblea constituyente estilo Cubano di su mes, no a preocupa pa laga Asamblea Nacional aproba. Awor, ta logico cu e presidente di e asamblea ey ta bay pone todo por todo pa salba un proyecto dudoso di nan contrincantenan politico? No, nan tambe ta politico y cu un sonrisa grandi ta bisa cu nan tambe ta haya e proyecto “strategico” y seguidamente ta sigui pa bay atende tur e problemanan cu pa nan tin mucho mas pura y prioridad, cu eventualmente prepara un upgrader na Aruba, cu por duna nan den e miho caso 90.000 bari pa dia di crudo mehora, mientras cu na Venezuela nan mester di biyones pa purba por lo menos aumenta produccion di menos di un miyon bari pa dia awe, na mas di dos biaha esey.

Cu esey nan interes pa e facilidadnan na Aruba por t’ey, pero mas bien pa e posibilidadnan di almacena crudo na Aruba, pa carga barco grandi (VLCC) pa biahenan largo, por ehemplo pa China. Pero e facilidadnan ey nan por usa tambe si nan ta pertenece na un compania di Aruba mes; no tin motibo pa laga compania di exterior opera esey. A corto plazo, si Citgo termina tur operacion na Aruba, nos mester contempla di tur manera continuacion di trabao pa garantisa cu e puerto ta funciona, pa e productonan pa Aruba mes por drenta. No mester ta asina dificil pa haci e transshipment tambe anto. E momento a yega pa nos contempla nos futuro, cu wowo hancho habri…

LJMADURO – 03-APR-2019