Refineria mester un permiso nobo momento cu ta incia trabou

E permiso pa haci cierto molester, yama Hindervergunning, di Valero no ta valido mas. Den e caso e trabou pe reapertura ta cuminsa, Citgo mester pidi un permiso nobo y gobierno mester otorga esaki prome lo inicia cu e trabou.

Esaki Bon Dia Aruba ta conclui a base di evalua e ley Hinderverordening y e contesta di gobierno riba e conseho di Raad van Advies riba e ley di Citgo.

Den nos edicion di dialuna nos a publica cu nos tin e permiso bieu. E ta trata di un decreto ministerial di fecha 11 juli 1990. E ta otorga na Coastal y despues a pasa over pa Valero. Banda di exigencianan pa siguridad, e Hindervergunning ta mara e refineria na e exigencia di articulo 4 cu nan mester preveni di transporta of dump huma, damp, likido of otro substancia den suela, lama of aire cu por daña e salud di hende, bestia of mata.

Minister Mike de Meza encarga cu e proyecto di reapertura di refineria, y tambe como minister resposabel pa medio ambiente, a expresa varios biaha cu na comienso lo mara Citgo na e permiso bieu. Sinembargo den e ley di Hinderverordening cu ta regla e Hindervergunningen, nos por lesa den articulo 15 cu mester pidi un permiso nobo momento cu kier reanunda operacion di un planta cu ta cera pa mas cu 2 aña. E refineria di Valero ta cera pa mas cu 4 aña.

Un otro factor tambe ta hunga un rol, momento cu ta haci cambio na e planta, tambe mester pidi permiso di nobo, pues esun bieu tampoco ta conta mas.

Den e caso di Citgo e problema ta cu gobierno kier cambia e ley principal, pues e Hinderverordening. Nan kier kita refineria for di lista di compania cu ta cay bou di e ley aki. Y traha un ley nobo, un Landsbesluit apart cu e condicionnan ambiental y di siguridad. Pero nan no por bin cu e Landsbesluit ainda pasobra esaki ta depende un estudio cu Citgo lo haci di e condicionnan di e tereno y instalacionnan. A base di esaki gobierno/e compania estatal RDA y Citgo lo termina e condicionnan final.

Raad van Advies a duna un conseho hopi negativo riba e cambionan legal aki pa motibo cu ta crea un bashi legal unda e ciudadano ta keda sin derecho y gobierno no por mara e refineria na niun condicion. Gobierno a tuma e conseho aki nan serio y a dicidi e ora di no cambia e ley, tanten cu nan no a delibera cu Citgo riba e condicionnan final pa hinca esakinan den e Landsbesluit.

Apela

E decision aki ta nifica cu e ley Hinderverordening lo keda conta pa e refineria y asina obliga Citgo pa pidi un permiso. Momento cu e peticion a drenta na gobierno, ciudadano tin 30 dia pa apela esaki. Un luna despues e ministernan encarga cu Husticia y Infrastructura mester dicidi riba e peticion y tambe notifica esunnan cu a bay den bezwaar.

Manera ta conoci di e diferente articulonan cu a sali den Bon Dia Aruba, tin habitantenan preocupa den Fort Heuvelstraat cu e desaroyo riba e pida di tereno di refineria cerca di nan. Y tambe tin preocupacion nobo pasobra den e contracto entre gobierno cu Citgo ta para cu nan lo bay traha un landfill (nobo) unda nan mag di dump e sushi cu ta resta. Den e contracto ta para cu nan mester haci esaki den un forma responsabel pero con nan ta bay haci ey bou cual condicion no ta conoci ainda. Ademas gobierno/RDA tambe ta responsabel pa limpia e sushedad cu Valero a laga atras, entre otro e asbest y otro substancianan peligroso pa salud, manera sushi radioactivo. Pa haci e trabou aki e compania estatal RDA tambe mester pidi permiso a base di e ley Hinderverordening.