E di cinco importador Mericano mas grandi di crudo Venezolano, PBF Energy Inc, a suspende e compra directo di e empresa petrolero estatal PDVSA, segun cuatro fuente, profundisando e desacuerdo entre e companianan, desde cu un serie di sancion a keda imponi riba e pais Sudamericano, Segun agencia noticiero Reuters ta revela.
PBF ta e segundo cliente di PDVSA en busca di otro proveedor pa motibo di discrepancia, loke lo agudisa e situacion financiero grave di e compania Venezolano, cu e luna aki ta enfrenta pago di 1.200 miyon dollar na su tenedornan di bono.
Mas di 90% di e entradanan di exportacion di Venezuela ta bin di nan benta di petroleo y e refinerianan Mericano ta entre nan miho pagadornan cu cash.
Na augustus ultimo, gobierno di presidente Donald Trump a impone sancion riba Venezuela, parcialmente prohibiendo acuerdo financiero nobo cu PDVSA. E restriccionnan a haci cu hopi banco ta rechasa emision di carta di credito pa sigura benta di crudo.
Na september, PBF a notifica PDVSA cu “no ta bay ricibi mas cargamento di crudo Venezolano” segun un fuente di e empresa estatal cu a pidi pa mantene su identidad confidencial, pasobra e informacion no ta publico.
E notificacion a ser haci despues cu un tanker cu crudo pisa Venezolano destina pa PBF a keda pega mas di 40 dia entre juli y augustus dilanti costa di Louisiana, wardando riba un carta di credito.
Ningun di e dos empresanan a precisa si e contrato di suministro di 33.000 bari pa dia (bpd) entre nan a keda termina. E firma Mericano no kier a papia di “informacion di negoshi confidencial” y PDVSA no a responde riba un solicitud pa emiti declaracion.
PBF, cu sede na New Jersey, no a cumpra crudo directamente di PDVSA desde inicio di september, segun datonan di Thomson Reuters. Pero su refineria di Chalmette, na Louisiana, si a cumpra atraves di intermediario den e ultimo lunanan y a aumenta nan compra di otro nacion, manera Colombia.
E controversia mas reciente entre e partidonan tabata en torno di con substitui e mecanismo di carta di credito estableci den e contrato, segun e fuentenan. PDVSA a pidi PBF haci prepago riba e cargamentonan, pero e compania refinador ta prefera cu e compania Venezolano ta otorg’e credito.
E empresa petrokimico Brasileño Braskem na september a suspende prome cu tempo un contrato di compra di nafta y gasolin natural cu PDVSA, despues di no alcansa un acuerdo pa su renobacion.
Otro clientenan di PDVSA na Merca, entre nan e compania refinador Phillips 66, ta importando menos crudo Venezolano e aña aki, pa problema di calidad.
En total, e exportacion di petroleo Venezolano pa Merca a baha te menos di 500.000 bari pa dia (bpd) na september, segun datonan di Reuters, como 38% menos cu den e mesun luna na 2016.
