Refineria Isla ta aclaria insinuacion cu nan ta tuma revancha

WILLEMSTAD – Refineria Isla no tin niun clase di accion contra di trahado ni contra di studiantenan den e scol vocacional (bedrijfschool). Loke ta pasando ta simplemente cu no tin cen y mester tuma e medidanan necesario. E prioridad ta na e momentonan aki pa tene e refineria habri y mantene e cuponan di trabou actual intacto. No tin nada di ningun revancha contra ningun hende. Di e forma ey e vocero di Refineria Isla Earl Balborda a haci su declaracion pa contraresta enfermonan eroneo cu ta core riba rednan social.

Den oranan di merdia un persona cu ta bishita e scol vocacional a saca potret di un participacion na e studiantenan. E informacion ta bisa e.o cu Refineria Isla a dicidi cu lo no laga e studiantenan caba nan trayecto pa bira ‘operator’ na e momentonan aki. Dia 15 di maart proximo lo ta e ultimo dia cu e studiantenan actual ta forma parti di e scol vocacional. Ta informa cu e studiantenan lo cobra fin di februari y mita luna di maart. Isla lo entrega certificado pa e parti teoretico. Isla lo NO cobra e studiantenan e sobra cen cu falta pa e laptop. Den mesun rosea ta splica cu den caso cu tin claridad di futuro y cu refineria ta sigui opera normal y cu crudo ta drenta i tambe cu CUROIL ta tuma TUR producto, lo pidi lesnan cu ta disponibel pa sigui cu e programa. Cualke studiante cu haya trabou prome cu 15 maart, Isla lo coopera pa e bay mas tempran. Tambe Isla lo yuda pa studiantenan haya trabou na otro companianan. Isla lo yuda esunnan cu ke cuminsa otro trayecto di formacion. Isla lo skirbi carta di recomendacion.

Earl Balborda ta enfatisa cu awor aki tabata e momento oportuno y p’esey mester a actua awor aki. Ta asina cu e studiantenan ta na un crusada, den sentido cu nan a caba e parti teoretico y ta prepara pa bay cuminsa e parti practico. A para e trayecto awor y no laga e studiantenan cuminsa cu e parti di practica pa despues para e trayecto memey di esey. E vocero ta insisti cu no tin niun accion contra di trahadonan, ni tampoco asunto y niun revancha manera cierto comentarionan ta insinua. Simplemente Isla mester wak su prioridadnan pa tene e refineria habri. No tin cen, p’esey mester maneha conforme e situacion.