WILLEMSTAD – Durante ultimo dianan a trata na crea e impresion den medionan di comunicacion cu Refineria di Corsou (Rdk) y gobierno no a tuma oferta di un compania cu kier a cera un tolling deal oferta di compra y benta di crudo pa un refineria refina) pa rafina crudo den nos refineria na serio y cu no a actua diligente riba e acercamento aki, cual no ta cuadra cu e berdad.
RdK ta haciendo lo maximo pa na prome luga haya un partner strategico pa modernisa, maneha y opera nos refineria ora e actual contract cu PDVSA termina na fin di 2019. Na mes momento RdK ta haciendo todo por todo pa wak con mas por yuda e actual operado Refineria Isla pa reanuda cu e proceso di refinamento no obstante e retonan cu e ta confronta, debi na e dificultadnan cu Venezuela y PDVSA ta confrontando.
Den realidad ta e actual operado so, cu ta Refineria Isla, por cera un acuerdo cu tercer pa suministro di crudo y despacho di producto. E tipo di dealnan aki ta bay contra pago pa e servicio di procesamento, e asina yama tolling deal. RdK lo no mete cu e tipo di negociacionnan asina. Sinembargo, RdK lo pasa e proposicionnan di tolling cu drenta rapidamente pa Refineria Isla sperando cu entre e proposicionnan aki talbes tin uno cu Refineria Isla por yega na un acuerdo cu ne pa di e forma ey tambe e refineria por drenta bek den operacion. Te ainda esaki no tabata e caso.
Di otro banda Refineria di Corsou, semper ta evalua tur compania cu presenta, cu si e compania ta desea di participa den e proceso cu lo mester conclui den un partner strategico pa despues di 2019. RdK a haci esaki tambe den e caso specifico cu a keda publica.
