Refineria, cabay di campaña… Atrobe/ainda…?

E anuncio di e escogencia di algun partner pa lidera e renacimento di e refineria a causa bastante reaccion den medionan local, y no sin razon. Den cierto sentido, e anuncio ministerial a resulta den mas pregunta cu contesta. Di parti di e mandatario en cuestion lo bisa cu nunca ta bon, si e no bisa nada ta keha cu no tin transparencia, y ora e bisa algo tampoco ta bon. Esey por ta e caso pa loke ta cierto critica, pero no ta satisface completamente. Y tin algo mas.

Lo bisa cu ta casualidad, pero como unico partido politico esun di e promer ministro a anuncia cu campaña pa eleccion otro aña a cuminza. Tabatin basta reaccion di hende sorprendi cu e anuncio, pero ok, si nan kier cuminza caba, esey ta nan asunto. Inmediatamente despues ta bin awor e anuncio di e rehabilitacion di e refineria, cu mester trece na 2021 caba un mehoracion di GDP di 16%… ademas di trabao pa alrededor di 2.000 hende… Den e aña dificil aki, ademas cu esun venidero lo no ta mucho mihor, si nada no cambia, esey lo mester a cay manera mana for di cielo…, pero esey no a resulta asina, pasobra e scepticismo tabata bastante grandi, y no solamente di e contrincante politico tradicional.

Awor, si e proyecto cu gobierno a presenta tabatin un base solido, nos por a imagina cu e recepcion lo tabata mas positivo, pero di loke nos ta mira awor ta dificil pa yega na otro conclusion, cu ta cu aparentemente den pura a scoge pa algo cu mucha di scol por mira cu e no ta cuadra. Por ehemplo, ta insisti cu e mihor candidato pa rehabilita y opera e refineria ta un compania cu no tin absolutamente ningun experiencia conoci riba e tereno di petroleo. Esey tabata di spera caba, pasobra na juli ultimo durante un rueda di prensa di nos promer ministro nos redaccion a puntra si ta berdad cu e lista di interesado no tabata menciona ningun candidato cu tabata pertenece na e sector petrolero, mucho menos un compania cu refineria di cierto renombre. Nos no a haya contesta, loke no tabata un problema pasobra ya nos tabata sa cuant’or tin: atrobe den e region aki ta bay hunga cu futuro di pueblo cu aventureronan cu lo mester limita nan mes na e sector na cual nan ta pertenece. Y ta logico cu ta e tipo di aventurero nos ta hayando actualmente, pasobra e companianan estableci di e sector ta keda leu di e tipo di proyecto aki, cu no tin futuro den e actual situacion di mercado mundial. Ta parce cu e hendenan aki, y nos gobernantenan igualmente, ta abstene di lesa cierto informacion di con e mundo aki ta draai actualmente y ta ignora realidadnan grandi cu ningun di nos por ignora. Y si ta keda insisti cu e proyecto aki ta factible, anto na un dado momento lo mester bin e pregunta: Ta haci esaki pa ignorancia, o pa otro motibo?

Nos ta kere cu ta bon posible cu tin un otro motibo. Un ta e afan pa cueste lo que cueste bin cu un plan cu ta logra tapa wowo di tur hende, brindando un perspectiva pa e proximo añanan cu ta duna en todo caso e impresion cu e gobierno aki ta logrando algo. E impresion ey mester dura por lo menos te september 2021, pa por bay eleccion cu un mensahe positivo, cu ta logrando resolve e problemanan economico di Aruba. Hunto cu e yegada di e vacunanan contra Covid-19 y un posible regreso gradual di turismo, esaki lo por percura pa un perspectiva, talvez no tremendo, pero en todo caso aceptable. Esey nos por comprende for di un punto di vista politico, cualkier partido cu actualmente lo tabata den gobierno, lo ta buscando esaki tambe. Pero, si e idea tabata pa bin cu algo cu realmente lo a impresiona, pakico no a bin cu e mensahe cu ta bay desmantela e refineria y bin cu inversionnan cu di berdad ta orienta riba un futuro nobo, es decir basa riba un futuro cu ta cuadra cu e direccion den cual mundo ta moviendo, cu no ta petroleo…

Awor nos ta haya nos cu e situacion absurdo, cu un compania cu ta mas den energia renovable, ta bay drenta un sector cu nan no conoce, pa gasta 3,5 biyon dollar riba e monton di hero bieu cu nos tin, pa despues eventualmente, si esey no resulta, nan bay “transforma e refineria den algo otro”, palabranan di nos promer ministro den e splicacion den Staten dialuna pasa. Laga nos purba imagina di kico e tabata papia aki: promer bo ta hinca 3,5 biyon dollar den un refineria obsoleto, anto si mundo bay den otro direccion – loke ta pasando caba, pero por ta cu e promer mandatario no a ripara esey ainda – anto ta bay haci algo otro cune… Na modo di papia: si bo tin un Plymouth Belvedere 1957, tur na werki, bo ta bay restaur’e promer, pa hopi placa, anto despues bo ta bay laga traha un boto pa Kustwacht cune… Nos ta comprende cu unavez a declara campaña pa inicia, ta bin cu algo, pero pa confronta nos cu e absurdez aki, no tin sentido.