Segun agencia noticiero Reuters desde siman pasa, e destilador number 3 di Amuay, e refiner mas grandi di Venezuela, ta paralisa pa motibo di un inventario aabao di crudo. Asina un lider sindical y un trahado di e unidad a declara na prensa. E refineria tin un capacidad di 645.000 bari pa dia (bpd).
Amuay actualmente lo ta refinando un 200.000 bari pa dia di crudo, despues di e paro di operacion di e destilador diahuebs ultimo, esaki Iván Freites, un representante di trahadonan a bisa. E ta conoci pa su critica como lider sindical encuanto e maneho di e empresa estatal Petróleos de Venezuela, SA (PDVSA).
Di e cinco unidadnan di destilacion di e planta, solamente dos lo ta trahando, Feites a agrega. Un trahado di Amuay, cu a pidi pa no ser identifica, a confirma e parada “a causa di inventario abao di crudo.”
Freites a agrega cu e flexicoker di Amuay ta continua para, mientras cu Cardón, e refineria bisiña, ta produci como 110.000 bpd, di e 310.000 bpd di capacidad. E dos unidadnan aki ta conforma e Centro di Refinacion Paraguana (CRP), uno di esunnan mas grandi di mundo.
PDVSA no a responde di inmediato riba un solicitud pa comentario.
Recientemente, Reuters a anuncia cu suministro di crudo na e subsidiario Mericano Citgo a disminui,a base di e prioridad di entrega di crudo na China y Rusia, pa cumpli cu e pagonan riba e debenan cu ambos pais y nan empresanan petrolero. Esaki lo ta obligando Citgo cumpra mas crudo riba mercado Mericano, pero tin problema cu pago na tempo na su proveedornan.
