Recientemente Aruba tabata den espera pa e decision cu tanto Gobierno di Aruba y Gobierno di Hulanda lo mester a tuma pa loke ta trata e Ley di Reino di Supervision Financiero (RAft). Despues di diferente combersacionnan y reunion den Parlamento di Aruba, Gobierno di Aruba a dicidi cu no ta acepta e ley di RAft.
Ayera, a traves di e medio di noticia local Noticia Cla, por a lesa cu e tema di refinanciamento di Aruba su debe di Covid-19 y e tratamento di ley di RAft no a keda declara controversial. Esaki ta nifica cu e tema por sigui keda trata normalmente pa e gabinete demisionario Rutte IV.
Segun e portal ta informa, ayera mainta Tweede Kamer su comisionnan a trata e temanan di e lista largo, riba cual e temanan di refinanciamento di e debe di Covdi-19 y tratamento di ley di RAft, tambe tabata aparece.
Segun confirmacion cu NoticiaCla a ricibi for di BZK, e dos temanan en cuestion no a keda declara controversial, un alivio y bon noticia pasobra e Gabinete y Secretario di Estado Hulandes, Alexandra van Huffelen por sigui ofrece Aruba, como tambe Corsou y Sint Maarten, refinanciamento di e debe di Covid-19.
Ademas di esaki pa Aruba specificamente lo sigui trata e ley di RAft di un forma normal, cu tur su implicacionnan.
Den caso cu Tweede Kamer lo a declara e dos temanan aki controversial, esaki lo a nifica cu no lo a ta trata nan mas y lo a warda esaki pa e proximo gobierno cu sinta despues di e eleccion di Tweede Kamer na November proximo.
