Referendum pa trahadonan di CMB y Hyatt cumpli cu rekisito legal

Tin dos referendum na caminda pa trahadonan bancario di CMB y trahadonan di housekeeping di hotel Hyatt lo  wordo representa pa un sindicato.  Mediador di gobierno, Anselmo Pontilius ta informa na Bon Dia Aruba cu ambos solicitud di referendum ta canando nan proceso normal y eventualmente nan lo tuma luga prome cu fin di februari.

Semper mediador di gobierno ta puntra e partidonan si nan kier evita e referendum. Si tin un reconocimento ta wordo elabora mediante un documento cu nan tin prepara den cual e partidonan ta reconoce otro,  y no tin referendum.  Pero si esaki no ta e caso, e proceso legal ta continua pa fiha e fecha, ora y luga  di e referendum

Referendum CMB
Diahuebs ultimo, mediador di gobierno a reuni cu representante di e banco cu e periodo di 14 dia a transcuri y aworaki nan ta deliberando caba pa establece fecha, ora y luga di e referendum.

Diamars otro siman nan lo reuni tanto cu gerencia di CMB y representante di sindicato FTA cu a pidi e referendum aki pa asina e proceso por sigui continua pa 14 dia mas. E ta kere cu otro siman lo wordo defini e convocatorio di e referendum aki pa loke ta dia y ora ya cu  probabel e referendum lo tuma luga na oficina di mediador di gobierno.

Referendum Hyatt resort
Pa loke ta e referendum di e trahadonan di housekeeping di Hyatt pa dia 13 di februari, mediador di gobierno lo reuni cu gerencia di e hotel aki y tambe dirigentenan di FTA  tocante e referendum. Den e reunion aki nan lo debati riba e detaye di e proceso.

Segun sr. Pontilius ta posibel cu prome cu fin di luna e dos referendum lo tuma luga si no tin un reconocimento di e sindicato di parti di gerencia di CMB y tambe di Hyatt resort pa no sigui cu e proceso di e referendum aki. El a splica cu na momento cu e referendum wordo anuncia ta bin un proceso di 14 dia cu e ley ta exigi pa wak si tin otro sindicato cu ta informa di participa.

El a laga sa cu no semper e proceso aki ta cana mescos, ya cu si e sindicato ta cualifica pa e referendum y si e partido mutuamente ta desea, nan por ahusta e agenda y haci e referendum mas tempran pasobra nan a cumpli caba cu e rekisitonan legal.