E situacion na Orchid Casino tabata hopi tenso pero e sindicato FTA a logra un acuerdo cu e gerencia pa kibra e impassa: mas pronto posibel lo tene un referendum.

For di siman pasa, gerencia di Orchid Casino y sindicato FTA representa cu nan respective abogadonan ta reuniendo hunto cu Mediador di Gobierno pa busca un solucion na nan diferencianan. Ta asina cu FTA a yega di denuncia cu e gerencia di casino menciona cu ta opera den Riu Antillas Hotel no kier reconoce FTA pa representa e trahadonan, despues cu e sindicatoaki a gana e referendum mas cu dos aña pasa. Finalmente pa resolve e impasse aki ambos partido a yega na un acuerdo mutuo pa tene otro referendum e siman aki.

E debate cu a surgi tabata ta cu e referendum di 2014 a tuma luga pa un minoria di trahadonan e tempo ey. Pa evita e debate si sindicato FTA tin mayoria of no, gerencia di e casino a propone pa celebra un referendum mas pronto posibel, sin cu ta bay mediante tur e proceso burocratico di un periodo largo. E partidonan a bay di acuerdo pa Mediador di Gobierno conduci e referendum aki cu ta tuma luga mañan diahuebs di 3’or pa 6’or atardi na MFA Noord.

Antecedente
Bon Dia Aruba a papia cu Mediador di Gobierno Anselmo Pontilius kende a splica cu ta bon pa sa cu un grupo di e trahadonan di e casino aki tabata trahado inicialmente di e Westin hotel cu a cera. E trahadonan aki nunca a dicidi pa acepta un pakete of pago final sino cu nan a scoge pa mantene nan empleo den casino. E operado cu a bini ora cu e Riu Antillas a habri a tuma e grupo di mas cu 30 trahado aki over; y nan a continua den e casino.

Un di e kehonan di e operador nobo di e casino tabata ta cu apart di e grupo di trahadonan bieu a bin mas trahadonan nobo acerca. Nan tabata trahadonan cu nan emplea durante e ultimo dos añanan, y nan tabata den nan periodo di prueba y nan no a participa den e referendum. Pa e motibo ey, e compania a procede legalmente contra e decision di Mediador di Gobierno. Den e prome proceso na LAR (derecho administrativo) pa wordo declara cu e decision di Mediador di Gobierno ta di acuerdo cu e ley di referendum. E compania no a keda satisfecho cu e sentencia aki y nan a procede di entabla un caso den Corte di Prome Instancia, pero den e tratamento di e caso finalmente nan a scoge pa no bay spera un sentencia di hues sino laga atras e caso y bay bek sinta na mesa cu e sindicato. “Esey a conduci na e discusion. Tin un discusion fuerte entre FTA cu gerencia… y nos a bisa nan cu mester di un salida di e caso akinan”, segun sr. Pontilius.

Condicionnan
Mañan e trahadonan di casino cu ta por lo menos 74 lo tin oportunidad di emiti nan voto di un total di 84 trahadonan, y esun cu ta gana mester haya e mayoria absoluto di e mita plus un di loke e trahadonan ta dicidi. Mediador Pontilius a laga sa cu e trahadonan lo haya tur oportunidad pa bin emiti nan voto. Den caso cu FTA ta haya e mayoria, e ora ey ambos parti lo drenta den profundidad pa resolve e puntonan cu ta pendiente pa yega na un prome contracto colectivo (CAO).

Aunke den pasado un grupo di trahado a wordo representa caba mediante FTA y otro sindicato di e compania mes, pues ya caba nan tabatin un CAO. E compania ta abstene di sinti nan mes obliga di aplica tur e beneficionan aki pa e trahadonan nobo. Pero di e otro banda e sindicato ta bisa cu den nos sistema legal ta cu “ley pa un ta ley pa tur” y e trahadonan mester haya trato igual.

Otro punto di debate tin di haber cu e posibilidad pa cambia condicionnan di trabou. Ya cu tin keho di e trahadonan cu a bin nobo, ya cu nan ta bisa cu nan no ta disfruta di e mesun condicionnan secundario di e trahado bieu. Segun sr. Pontilius e referendum di mañan tin cu determina e representacion sindical prome.

Reconocimento sindical
Encuanto si un dunado di trabou por abstene di reconoce e presencia di sindicato den nan compania –a pesar cu e sindicato a gana e referendum- sr. Pontilius a bisa cu legalmente no ta posibel. P’esey ora e gerencia di e sindicato a procede den LAR nan a perde e caso. E situacion cu a surgi tambe ta cu e operado a yega nobo y logicamente nan no ta den un posicion pa cumpli cu un cantidad di demanda di e trahadonan. Sinembargo e dunado di trabou tin un obligacion legal pa sinta na mesa y nan a yega di sinta na mesa den varios ocasion. Pero den nos sistema legal bo por sinta na mesa hopi biaha hasta “miles di biaha pero no tin un instrumento pa obliga bo firma un acuerdo.

Finalmente Mediador di Gobierno ta kere cu e reunion cu nan a sostene diabierna y dialuna ultimo tabata hopi mas habri entre abogado di e compania (mr. Saade) y abogado di e sindicato FTA (mr. Figaroa); tambe entre presidente di sindicato y gerencia di e casino cu a dicidi cu no ta prudente pa sigui den un confrontacion. P’esey nan a bay di acuerdo pa realisa e referendum relampago diahuebs awor y despues di e resultado nan ta evalua pa sinta y mira ki areglo nan por yega di un biaha pa tur e trahadonan. Sr. Pontilius ta convenci cu despues di e referendum ambos parti lo supera nan diferencianan y sin den caso e sindicato ta haya e mayoria –manera nan mes ta sigura- ya caba e compania tin den su poder un proposicion di e sindicato. Pero e sindicato tambe tin e pensamento di e compania. “Nan mester por yega na areglonan concreto”, asina Mediador di Gobierno a declara na Bon Dia Aruba ayera.