FTA a dicidi di pidi un referendum na Mediador di Gobierno. Esaki despues cu den un conferencia di prensa, e sindicato aki a denuncia cu gerencia di CMB no kier a reconoce e derecho di e trahadonan di e banco aki pa afilia nan mes na FTA.
Mediador di gobierno, Anselmo Pontilius a declara na Bon Dia Aruba cu nan a ricibi un carta formalmente di FTA den cual nan ta solicita e referendum pa e trahadonan den servicio di Caribbean Mercantile Bank Aruba.
Ya caba oficina di mediador di gobierno a publica e anuncio cu ley di referendum ta exigi pa haci riba e convocatorio di e referendum pa e trahadonan di CMB. Den e transcurso di e 14 dianan cu ta coriendo caba, cualkier otro sindicato por informa tambe nan interes pa participa den e referendum aki.
‘E proceso a cuminsa caba!’, sr. Pontilius a bisa. Unabes cu e plaso di e 14 dianan pasa, Mediador di gobierno tin cu invita e partidonan bin mesa y splica nan e procedura normal pa e referendum.
Den e proceso aki e sindicato tin cu presenta e lista di nan miembronan y tambe mustra e lista di e trahadonan di e banco. Unabes cu esey pasa y si e sindicato tin suficiente pruebanan, Mediador di Gobierno ta procede pa convoca e referendum.
“Den e proximo simannan sigur bo lo tende kico ta bay ta e resultado di esaki, pasobra tur indicacion ta mustra cu lo tin un referendum pa trahadonan di Caribbean Mercantile Bank Aruba”, segun mediador.
