Continuando cu e topico di economia, Gabinete AVP-FUTURO ta splica detayadamente den nan programa di gobernacion kico ta e strategianan cu nan lo implementa pa logra un maneho economico inclusivo. E meta di e maneho ta pa mehora e poder di compra; baha e costo di bida; baha gasto y agilisa e proceso di haci negoshi; mehora e clima di inversion; stimula participacion mas amplio di comunidad den economia; stimula diversificacion di Aruba su economia; y stimula un economia mas sostenible y duradero.

Pa baha gasto di vivienda Gabinete AVP-FUTURO lo evalua e posibilidad di subi e “huursubsidie” pa hogarnan cu ta depende di un entrada minimo; lo investiga e nivel di competencia den e mercado di hipoteca; y lo implementa un maneho di vivienda (“Plan di Maneho pa Vivienda”) pa stimula construccion y disponibilidad di mas cas pa huur riba mercado di vivienda.

Gobierno lo stimula doño di edificio den centro di San Nicolas y Oranjestad pa converti e segundo piso den vivienda, evalua posibilidad pa ofrece huurdo un subsidio pa yuda paga huur y un deduccion riba inversion adicional na e doño pa gasto di reparacion y mantencion.

Ademas di esaki Gabinete AVP-FUTURO lo studia e posibilidad di converti scolnan bandona den vivienda mixto pa hoben y adulto mayor; lo inicia dialogo pa permiti Algemeen Pensioenfonds Aruba (APFA) duna prestamo na interes reduci na Fundacion Cas pa Comunidad Aruba (FCCA) pa construccion di vivienda social; y lo evalua si por amplia e suma cu Fondo di Garantia ta duna pa cubri e “eigen inbreng” di famia cu tin cu fia placa pa construi un cas pa nan mes.

Gobierno tin den nan plan tambe regula mercado di “short term vacation rental”; limita posibilidad pa persona no residente cumpra cas na Aruba; y implementa un tarifa di grondbelasting diferente pa doño di propiedad cu no ta residente y un suma di registracion pa “short term vacation rentals”.

Baha gasto di utilidad tambe ta un punto di atencion y pa logra esaki Gabinete AVP-FUTURO lo baha prijs di gasolin y diesel door di reduci accijnzen gradualmente; lo stimula e transicion pa energia limpi, entre otro, door di traha mas parke solar cu lo provee coriente limpi y na un prijs reduci, pa economia y henter comunidad, cu atencion special pa famia cu ta depende di un entrada abou; y lo crea un programa di subsidio pa compra di panel solar pa cas pa yuda baha e gastonan di coriente structuralmente.

Pa baha gasto di schoolgeld, aircogeld y creche gobierno lo, entre otro, reactiva e plan pa instala panel solar na tur scol cu e meta di baha e gasto di coriente pa cubri “airco-geld” y “schoolgeld” y asina baha e gasto di scol pa mayor; y lo evalua e sistema di financiamento di enseñansa cu e meta pa baha gasto di scol y creche pa famia y percura un stabilidad financiero pa scolnan.

Pa baha gasto di transporte Gabinete AVP-FUTURO lo evalua y restructura Arubus y studia e efectividad di un sistema di “bus di bario” mas chikito y sostenible cu orario cu transporte ‘gratis’ pa adulto mayor y hoben; y lo restructura e rutanan pa brinda mas acceso na mas parti di e poblacion

Baha gasto y agilisa e proceso di haci negoshi ta un punto di atencion esencial pa e gabinete nobo. Pa logra e meta aki gobierno lo crea un portal digital pa centralisa tur permiso. E “One-Stop-Shop” pa permiso comercial, lo stimula un acercamento integral, mehora sinergia y colaboracion entre departamentonan concerni pa entrega tur peticion pa permiso den seis siman desde cu a entrega e peticion.

E meta principal ta pa tur ministerio cu ta duna permiso pa comercio, manera ministerio di Economia, ministerio di Husticia, ministerio di Turismo, ministerio di Salubridad Publico coopera pa haci e “One-Stop-Shop” un realidad, incluso cambio di legislacion y percura pa pone personal disponibel.

Pa mehora e clima di inversion, gobierno lo duna incentivo fiscal pa inversionnan den agricultura comercial, economia blauw, sector di tecnologia financiero, energia renobable, industria creativo y inversion den centro di San Nicolas y Oranjestad; y lo mehora e proceso di otorgamento di tereno comercial cu enfasis riba inversion den agricultura comercial, economia blauw, sector di tecnologia financiero, energia renobable, industria creativo y centro di San Nicolas y Oranjestad.

Pa Gabinete AVP-FUTURO diversificacion di economia ta un punto primordial y necesario. Pa por logra esaki gobierno lo enfoca riba cooperacion economico cu paisnan den region manera Colombia, Panama, Surinam y Caribe Hulandes, y pa mehora e comercio den region lo purba yega na tratado pa evita ‘double taxation’.

Desaroyo di sector di FINTECH ta importante. E estudio di United Nations Economic Commission for Latin America and the Caribbean (UN-ECLAC) lo forma e base pa implementacion di maneho pa pusha e desaroyo di e sector FINTECH y diversifica Aruba su economia.

Tambe gobierno lo intensiva y expande esfuersonan pa crea un economia basa riba conocemento y atrae institutonan Europeo y internacional pa establece na Aruba; y lo implementa maneho pa atrae digital nomads y empresario independiente (zzp-ers);

Pa facilita y stimula crecemento economico, Gabinete AVP-FUTURO lo implementa un Agenda di Inversion. E Agenda di Inversion ta un plan multinacional di inversion publico cu lo contribui na un minimo stipula di crecemento di Aruba su economia.

E Agenda di Inversion lo enfoca riba renobacion y mantencion di scolnan; revitalisa centro di Oranjestad cu vivienda, area pa actividad social; revitalisa economia, vivienda y bida social den San Nicolas y vecindario; lo analisa e posibilidad di construccion di un terminal di Fast Ferry y waf na San Nicolas; desaroyo di e tereno di RDA; transicion di energia fosil pa energia renobabel pa baha gasto di energia y mehora medio ambiente; y reactiva e plan di panel solar pa tur scol, cuminsando cu scolnan publico cu e meta pa baha e consumo di coriente y baha gasto di scol pa mayor.

E Agenda di Inversion lo enfoca tambe riba embeyecemento di bario den tur districto cu cas pagabel y areanan “berde” pa recreacion, practica di deporte y actividad social; construccion cas social duradero; y construccion di proyectonan di vivienda duradero pa adulto mayor.

E plan tambe ta inclui construi un Agri Innovation Park y stimula produccion di berdura y fruta local cu tecnologia moderno di horticultura; stimula e desaroyo di industria creativo; stimula e desaroyo di negoshi chikito y mediano pa ciudadano comparti mas den economia di Aruba; stimula desaroyo di industria di tecnologia digital, automatisacion, tecnologia financiero, etc.; y mantencion di infrastructura, edificionan publico, edificionan publico den centro di Oranjestad y San Nicolas, atraccionnan turistico y instalacionnan di companianan di utilidad.