Reduccion di accijns y aumento di reparatietoeslag pa pensionado: Fraccion AVP y Futuro a presenta amienda grandi pa presupuesto 2025

Ayera mainta Parlamento di Aruba a inicia tratamento di presupuesto di pais Aruba pa 2025. E reunion publico a cuminsa cu entrega di un amienda pa e presupuesto di parti di fraccion AVP y Futuro, cu ta consisti di cambionan grandi.

Mike Eman, lider fraccion AVP, a presenta e amienda den nomber di ambos fraccion indicando cu e ta un amienda cu ta cambia henter e rumbo di e presupuesto y alabes a elabora riba e cambionan mas grandi cu tin den e amienda.

E prome cambio cu e parlamentario a menciona ta cu nan lo implementa reduccion di accijns di 10 cen riba gasolin entrante 1 di mei di 2025. El a indica cu si mira kico e impacto di e prijs di gasolin ta, “e ta un peso grandi pa tur esnan cu mester transportacion pa yega na pia di trabou, pa hiba nan yiunan scol, pero tambe pa esnan cu ta den e transportacion, taxinan, tur esnan cu ta den e trabou importante di duna nos turistanan servicio, pero tambe comercio cu ta usa transporte tur dia pa mercancia.”

El a indica cu un reduccion asina lo tin un impacto directo pa e consumidor y un impacto indirecto tambe pa locual ta trata e prijsnan, probablemente, pasobra e ta yuda baha un di e costonan cu mas ta pisa riba e calculacionnan cu ta ser haci di gastonan di transporte na Aruba.

Di dos cambio cu Eman a presenta ta cu lo aumenta e reparatietoeslag pa pensionadonan cuminsando cu 250 florin pa luna desde 1 di mei 2025. Esaki, el a enfatisa, ta pa cuminsa. El a splica cu for di e posicion di oposicion na e momentonan aki ya caba nan por a haci e ehercicio aki.

Manera ta conoci, durante temporada di campaña e partido a indica cu lo aumenta e reparatieteoslag pa pensionadonan cu 500 florin, pero esaki, el a splica, no tabata posibel pa motibo cu e gobierno actual a haci un empeño pa purba di kita e espacio financiero pa nan no por logra e meta final di duna un compensacion husto pa e pensionado.

El a sigui indica cu e aumento inicial aki, cual ta dentro di e normanan financiero, ta mustra caba un cambio di mentalidad y pensamento caminda cu nan no ta busca di saca for di e saco di e ciudadanonan, pero ta busca pa percura pa e hendenan y esnan den mas necesidad ta esnan cu prome ta ser yuda.

“No ta 10 florin awo pa luna, despues cu bo ta kita di varios banda bo ta duna 10, pero ta 250 florin pa cuminsa desde 1 di mei caba, sin cu nos ta gobierno ainda. Ora cu tin tur e instrumentonan nos ta mira unda por aloca mas fondo pa por continua e direccion aki,” el a subraya.

E parlamentario a sigura cu esaki ta e prome fase pa cuminsa yuda esnan cu a sufri durante e ultimo siete aña aki pa motibo di medidanan. “Na momento cu tin instrumentonan pa por cuminsa tuma e pasonan necesario e ora ey ta bay mira con paso a paso, no solamente nos pensionadonan, pero esnan riba salario minimo tambe lo conoce e cambionan cu nan ta desea y cu e epoca di un gobierno basa solamente riba tuma medida y haci e bida di nos hendenan imposibel sin un perspectiva pa futuro a termina. Cu e amienda aki cu ta anuncia un cambio di direccion,” el a agrega.

Eman a splica cu e amienda di presupuesto ta inclui tambe un aumento, dentro di e margennan di presupuesto, pa inversion cu 30 miyon florin. El a indica cu tin un cantidad di edificio di gobierno atrobe den estado di deterioro y pa e motibo aki ta pone enfasis riba inversion pa mehora e producto di Aruba y mehora e calidad di bida di e ciudadanonan.

Otro cambio cu el a presenta ta pa yuda financia e cambio di direccion, cual ta e introduccion di un reduccion di goederen en diensten cu 10%. Eman a menciona cu pa añanan largo Raad van Advies a bisa cu nan ta mira tur aña e post di goederen en diensten ta 190 miyon florin y ta keda crece, pero pueblo no ta mira nada. Pa motibo aki e gobierno nobo ta bay reduci esaki cu 10% cu ta trece otro espacio financiero.

“Na momento cu bo ta traha riba momentonan di inversion pa nos comunidad, den poder di compra, of inversionnan duro pa produci un miho producto pa Aruba, mester mustra tambe cu bo ta haci ehercicio pa por capitalisa pa esaki. Y esaki ta sigur locual nos ta bay logra cu e reduccion di goederen en diensten,” Eman a sigura.

El a indica cu e cifra cu nan ta bay logra yega na dje ta 21 miyon florin di reduccion. El a agrega cu den esaki lo tin reduccion tambe di gasto di personal di e bureau di ministernan. El a splica cu na e momentonan aki tin poni cu tin 25 trahado pa minister, cual el a menciona nan lo reduci. El a sigui splica cu tin poni tambe un cantidad grandi pa loke ta trata esnan cu ta carga e Conseho di Minister, caminda tambe nan lo introduci cambio.

Eman a remarca cu e total di cambio aki hunto cu e reduccion di henter e aparato di minister di ocho pa siete minister lo produci un rebaho di 8.5 miyon florin pa keda dentro di e norma, pero na mesun momento pa yuda e pensionadonan, yuda inversion den e pais y yuda baha e gastonan di accijns.

Eman a menciona cu durante e reunionnan cu su persona como co-formador y colega Gerlien Croes a tene cu diferente organisacion, un di e organisacionnan cu nan a papia tabata Fundacion Pa Nos Comunidad. E fundacion, el a splica, a bisa cu nan a mira un aumento dramatico di e cantidad di pensionado cu ta bin busca ayudo pa e pakete di consumo mensual.

El a indica cu den e presupuesto di gobierno actual tin “un miserabel 45 mil florin” poni disponibel pa e fundacion. Pero cu e aumento di hendenan cu ta busca ayudo cerca e fundacion, a pidi pa un ayudo di 500 mil florin, cu segun Eman a señala nan no a mira den e presupuesto.

El a remarca cu pa e motibo ey nan ta haya importante pa esaki tambe ta parti di un cambio den e presupuesto y ta aloca 500 mil pa Fundacion Pa Nos Comunidad den e amienda di presupuesto.

Presidente di parlamento, Gerlien Croes, a suspende e tratamento pa asina manda e amienda di presupuesto 2025 cerca e organonan consultativo pa por determina kico ta e impacto di e cambio di direccion di e presupuesto.

“Considerando e cambionan rigoroso cu ta wordo proponi sosteni pa 12 miembro di parlamento, ta responsabel pa e consehonan necesario ser pidi y duna riba esaki. Ta duna un maximo di tempo pa e consehonan aki ser pidi pasobra no lo desvia di e planificacion cu e presupuesto aki ta ser trata y finalisa prome cu dia 31 di maart manera a ser proponi pa Conseho di Minister di Reino,” Croes a subraya.