No ta mira ningun motibo pa pidi Conseho di Minister di Reino cambia e condicionnan pa e di dos tranche di sosten financiero di Hulanda. Como tal, Aruba mester keda cu e reduccion di 5 miyon florin pa luna cu ta bay pa e sector di cuido di salud. Esaki Secretario di Estado pa Asuntonan di Reino Raymond Knops a bisa e Comision Fiho riba Relacionnan di Reino di Tweede Kamer ayera.
Raymond Knops ta reacciona riba un carta cu Clinica Respaldo, na nomber di dunadonan di
cuido a manda pa Hulanda recientemente riba e tema aki. E Comision Fiho Relacionnan di Reino a pidi comentario di e Secretario di Estado, riba e carta unda ta pidi pa corta e reduccion solamente pa un luna, cu ta Juni. E dunadonan di cuido na Aruba a indica cu e caracter structural di e reduccion di 5 miyon florin pa luna, mester ta basa riba un kibocacion. “Ami lo a mal interpreta e conseho di dia 6 di Mei, di e Colegio di Supervision Financiero di Aruba, CAFT, riba e sosten di likides pa Aruba. Segun e dunadonan di cuido, no tin ningun otro motibo pa un medida specifico pa Aruba otro cu un reduccion temporal den uzo di cuido pa motibo di e ‘lockdown.’”
Reduccion di gasto ta data di 2019
Segun Knops, pa prome, e kier a mustra su respet pa e forma con e dunadonan di cuido di Aruba a atende cu e crisis di Covid. Pero pa locual ta e peticion y argumentonan cu a uza pa sostene nan peticion, no ta algo cu e Secretario di Estado ta comparti.
“Riba 6 di Mei, CAFT a referi na e estudio di Price Waterhouse Coopers di 2019 titula ‘Doorlichting kostenontwikkeling AZV’ (revision desaroyo di costo AZV) y tambe, e pensamento pa implementa cu urgencia e reduccion di gasto den cuido di salud. Di e forma aki lo por absorba e deficitnan den e structura di siguridad social y lo por frena e costonan di cuido cu ta aumenta constantemente.”
Contribucion propio
Segun Knops den su carta, CAFT a pidi pa e reduccion di costo aki den consehonan anterior, unda tambe ta mustra riba reduccionnan a termino corto. Asina ta posibel cu ta pensa riba un formula pa bin cu contribucion propio of risico propio, y tambe riba tereno di remedi tin posibilidadnan pa trece reduccion di costo a termino corto. CAFT a conseha pa Aruba a duna oido na e conseho specifico aki, y a determina e suma di 5 miyon florin pa luna, cu a kita di e sosten di likides tambe.
Despues di a haci pregunta na CAFT basa riba e ponencia di e dunadonan di cuido di Aruba, “mi ta convenci di e imagen cu e ehecuta e conclusion di e rapport di Price Waterhouse Coopers cu ta un peticion di Gobierno di Aruba, y cu CAFT tabatin e suma di 5 miyon florin di reduccion mensual pa AZV como su obhetivo. Como tal, mi ta conclui cu mi a interpreta e conseho di CAFT corectamente.”
E ‘con’ ta asunto di Aruba
E forma con Aruba ta ehecuta e tarea aki ta un responsabilidad local, Raymond Knops a informa e Parlamentarionan Hulandes. “Organo Ehecutivo di AZV a institui un plan di reduccion di gasto. Conseho di Minister di Aruba a dicidi pa ehecuta e plan aki. For di e conseho di CAFT pa e di tres tranche di sosten di likides di 24 di Juni, ta mustra cu e plannan ta consisti di medidanan incidental y structural cu pa motibo di e preaviso aki, no lo produci directamente un reduccion di 5 miyon florin pa luna.
Pero, ta kere si cu por yega na e reduccion proyecta di 35 miyon florin pa 2020. “Mi tin tur confianza cu esaki ta sosodiendo riba un forma responsabel. Como tal, a pesar di e respet cu mi tin pa e dunadonan di cuido di Aruba, no ta mira motibo pa informa Conseho di Minister di Reino pa adapta e condicionnan pa e di dos tranche di sosten di likides, manera cu e peticion ta referi na dje,” tabata e contesta di Raymond Knops.
