Pa lunanan largo, NASA y NOAA (National Oceanic and Atmospheric Administration) ta bin ta bati alarma cu e spectro wireless, cual e FCC (Federal Communications Comission) ta subastando pa uza pa rednan 5G, lo por interferi cu colecta di data uza den pronostico di tempo.

Presidente interino di NOAA, Neil Jacobs, a testigua na Capitol Hill cu e interferencia di e radionan nobo di 5G lo por reduci e precision di pronostico di tempo cu como 30 porciento. El a bisa e House Subcommittee on the Environment cu esaki lo resulta den residentenan costeño hayando dos pa tres menos dia pa prepara pa horcan, y lo por conduci na prediccionnan menos precies tocante unda e tormentanan mayor aki lo dal. Erornan asina den e prediccionnan aki por costa bida di hende, el a adverti.

FCC a cuminsa subasta e spectro 24GHZ na maart, na companianan wireless cu tin plan pa uza esaki pa e rednan 5G nobo. E siman aki, senadornan democrata Ron Wyden di Oregon y Maria Cantwell di Washington, a skirbi un carta pa FCC pidiendo pa e agencia stop di duna licencia pa ganadonan di e subasta te ora por haya un solucion.

E problema ta bin for di e uzo di e spectro den e frecuencia di 24 gigahertz, cu ta hopi cerca di e spectro cu NOAA ta uza pa colecta data pa pronostico di tempo. NOAA ta uza e spectro 23.9 GHz pa colecta data di condicionnan atmosferico cu ta wordo hinca den su model di data. E preocupacion ta cu portadonan di radio 5G cu ta uza e spectro 24GHz lo interferi cu e sensornan sensitivo riba satelitenan cu ta monitor condicionnan atmosferico.

Baha e poder di e radionan 5G lo por preveni e interferencia aki, pero Jacobs a señala cu e propuesta actual di FCC lo resulta den un perdida di 77 porciento di data for di sensornan riba satelite di NOAA. El a bisa cu expertonan di FCC y NOAA ta colaborando pa bin cu un solucion, y el a nota cu e tabata optimista.

FCC no a duna contesta inmediato pa comentario.

Tin otro frecuencianan cu FCC ta mirando pa subasta cu tambe por ta problematico pa pronosticonan. FCC tambe tin plan pa subasta spectrum cerca di esun cu NOAA ta uza pa detecta otro condicionnan climatico, manera sneeuw y ijs, como tambe otro condicionnan atmosferico.