ESTADONAN UNI (TheVerge) – Reddit a prohibi r/watchpeopledie, un subreddit infame unda ta post video di hende muriendo di forma grafico. E prohibicion ta yega despues cu e subreddit a repost video di e masacrenan recien na Moskee na New Zealand.
Segun e ‘landing page’ nobo, e subreddit a wordo prohibi pa motibo di viola e politica di Reddit tocante glorifica of curasha di violencia.
Un vocero di Reddit a duna e siguiente declaracion: “Nos ta hopi cla den e terminonan di servicio di nos pagina cu post contenido cu ta incita of glorifica violencia lo mira usuarionan y comunidadnan prohibi di acceso na Reddit. Subredditnan cu no ta adheri na e reglanan aki lo ser prohibi.”
E manifesto y video di e tiroteo en particular ta prohibi for di Reddit completamente, y ta wordo elimina riba e pagina. Sinembargo, e prohibicion riba r/watchpeopledie tabata relaciona cu nan maneho di tur dos material.
E prohibicion nobo ta concorda cu e cambio recien na politica di contenido di Reddit, cu ta haci e guia di moderacion di e pagina hopi mas explicito. E tabata asina cu casi tur cos cu no tabata ilegal tabata permiti riba e pagina, y awo, esey no ta e caso. Asina mes, e subreddit tabata activo desde 2012 y tabata bou cuarentena – e manera con Reddit ta describi comunidadnan cu ta explicitamente scondi for di publico – prome cu e politica di contenido di e pagina a cambia.
