Recientemente, partido ReD Democratico a presenta nan Plan di Partido, dividi den tres grupo social: hoben, adulto y adulto mayor.

Hoben

ReD ta continua desaroyando y expandiendo metodonan di enseñansa alternativo cu un maneho integra y responsable cu ta cumpli cu tur standard educativo, incluyendo EduCampus, Aruba Adventist Academy, Montessori High School, YNZ, De Schakel, Mon Plaisir MAVO/HAVO/VWO, EPB/EPI ABO y Colegio Hilario Angela. ReD ta diversifica educacion pa duna mas oportunidad, ya cu “One Size Doesn’t Fit All.” Digitalisacion y uso di inteligencia artificial ta importante pa educacion personalisa enfoca riba mercado laboral.

Ademas, ta considera cu diversificacion economico ta esencial, creando tipo di trabao y oportunidad nobo cu ta atrae Arubianonan pa bolbe. ReD a baha interes riba Arubalening pa studiante na 0%. Den siguiente termino di gobernacion, lo ofrece pa pordona debe di graduadonan cu compromete pa traha na Aruba pa al menos cinco aña. Esaki ta curasha regreso pa Aruba y entrepreneurship, ya cu studiantenan ta cuminsa liber di debe. ReD ta bay establece un Banco di Desaroyo cu ta ofrece prestamo faborable pa entrepreneurnan hoben. ReD a sigur acreditacion y reconocemento di diploma (SPO) y a mehora e calidad di diplomanan existente (EPB) y ta bay continua sigurando un miho futuro pa hubentud.

Pa salud y bienestar, ta bay haci cuminda saludable mas accesible financieramente. E programa di salud na scol ta ofrece participacion gratis den arte, cultura, baile, musica y deporte. Salud social ta ricibi sosten di gobierno pa duna tur mucha un oportunidad igual pa participa den programanan comunitario, incluyendo organisacionnan deportivo. Facilidadnan deportivo mester ta gratis! Gobierno mester planea centronan di comunidad cu un enfoke riba hubentud.

ReD ta promove uso di tecnologia y rednan social cu atencion riba salud mental di hubentud. Pa combati cyberbullying, ta bay introduci un programa educativo di prevencion den scol y comunidad, enfatisando respet, comunicacion positivo y seguridad digital. Adicionalmente, ta bay set up un programa di mentorship y sosten pa hoben y su famia den caso di abuso virtual. ReD ta reforsa programanan pa limita impacto di adiccion na rednan social y promove un balans saludable di uso di tecnologia.

ReD ta reforsa programanan di prevencion pa hoben pa preveni participacion den crimen. Programanan di mentor y training pa trabao ta implementa pa hobennan den riesgo. Ta introduci un programa di reintegracion pa hubentud involucra den crimen, enfoca riba un regreso na sociedad. Den asociacion cu autoridadnan, comunidad y scol, ta bay set up un red di vigilancia pa protege hubentud y duna nan un ambiente safe.

ReD tambe ta kere den poder di cultura y deporte pa motiba hubentud. Den gobierno, ReD a introduci Leerorkest na tur scol, permitiendo tur mucha toca un instrumento musical.

Finalmente, ReD ta reconoce cu hubentud ta impulsa cambio sostenible y ta crea un plataforma pa involucra nan den proyectonan ecologico. Den gobierno, ReD a introduci proyectonan di hardin escolar y ta continua programanan ambiental pa hoben, ekipando nan cu e conocemento y habilidadnan pa lidera proyectonan ambiental.

Adulto

Tocante costo di bida, ReD ta propone un plan strategico pa alivia presion di costo di bida riba hogarnan Arubano. Ta bay tuma medida specifico pa reduci costo di awa y coriente pa famianan di menos recurso mediante subsidio y incentivo pa uso di energia renobable. Mas opcion di financiamento pa energia solar na cas ta bay ta disponible, y ta bay curasha proyectonan pa mehora eficiencia di energia na cas.

Ta propone subsidio pa productonan di cuminda local y famianan vulnerable pa sigura cu tur hende tin acceso na cuminda basico na prijs pagable.

Ta continua implementando vivienda pagable di huur y propiedad pa famianan jong y adulto mayor. Ta combati inflacion door di regula sectornan clave manera energia, cuminda y vivienda. Ta implementa un politica pa stabilisa prijs di awa y coriente, dunando alivio financiero pa tur hogar Arubano.

ReD ta reconoce cu dependencia riba un solo sector economico, esta turismo, ta haci economia di e isla vulnerable. Ta propone introduccion di un di dos pilar economico pa stabilidad financiero: industria di cannabis y hemp. Desaroyo di un sector regula di cannabis lo por genera aproximadamente un biyon florin anual pa Aruba, creando oportunidadnan di trabao desde cultivo te distribucion y produccion di productonan deriva te maneho di exportacion, ofreciendo trabao na varios nivel di educacion.

Ta garantisa regulacion estricto pa sigura cu e industria aki ta contribui na un economia sostenible mientras ta protege salud y bienestar di pueblo. E diversificacion aki ta reduci dependencia di Aruba riba turismo y ta sostene otro sector, manera agricultura y investigacion. Ademas di crea trabao, industria di cannabis ta bay genera entrada significante pa gobierno, cu por inverti den infrastructura, cuido di salud, educacion y otro proyectonan social cu ta beneficia comunidad.

Tambe ta propone un plan comprensivo pa combati pobresa den cuatro area principal: empleo, educacion, acceso na servicio basico, y cuido di salud mental.

Ta bay crea mas oportunidad di empleo pa desempleadonan mediante training vocacional y tecnico, ademas di industria di cannabis menciona ariba. Ta bay expande programanan di educacion pa esnan cu a completa nan estudio pero kier sigui desaroya. Esaki ta bay enfoca riba sectornan nobo manera energia sostenible, aumentando oportunidad di empleo pa tur residente.

Ademas ta bay sostene esfuersonan pa reduci costo di awa, coriente y cuido di salud pa famianan vulnerable. Vivienda pagable ta bay ta un priordad. Ta bay implementa un programa pa construi vivienda pagable pa huur of cumpra, enfoca riba famianan jong y di menos recurso.

Pa combati e impacto di pobresa riba salud mental, ReD ta bay implementa programanan di psicologia y sosten comunitario, dunando cuido y mentorship pa kibra e ciclo di pobresa.

Tambe ta bay sigura cuido di salud mas accesible pa tur residente, enfocando riba cuido preventivo pa reduci malesa cronico. Ta bay expande facilidadnan di cuido di salud mental cu programanan di prevencion y sosten psicologico pa combati aumento di stress, ansiedad y depresion. Ta bay inverti den infrastructura di salud y introduci programa centra riba estilonan di bida saludable mediante deporte y nutricion. Meta ta pa sigura acceso husto na cuido di calidad y bienestar pa tur hende na Aruba.

Ademas, ta bay enfatisa un plan comprensivo pa protege medio ambiente y sigura sostenibilidad pa futuro. Ta bay introduci maneho mas eficiente pa desperdicio y awa, enfoca riba produccion di awa potable pa preserva recursonan natural, incluyendo suministro di awa potable di Aruba. Tambe ta bay expande uso di energia renobable, manera biento y solar, pa reduci dependencia riba combustible fossiel y protege medio ambiente di contaminacion. Ta bay desaroya programanan educacional y introduci regulacionnan mas estricto pa atende cambio climatico. Un solucion clave ta integra solar y wind farm offshore na costa nort di Aruba, dentro di nos awanan teritorial, pa genera mas energia renobable, crea trabao nobo y reduci dependencia riba fuentenan tradicional di energia

Adulto mayor

Ta bay reforsa sistema di pensioen pa sigura tur adulto mayor ta biba cu dignidad, sin preocupacion pa entrada. Ta bay implementa aumentonan gradual di pensioen pa cubri aumento di costo di bida. Ta bay provee facilidadnan pa adultonan mayor gana entrada adicional mediante trabao part-time of boluntario cu compensacion, basa riba nan habilidad y preferencia.

Ademas, ta bay provee adultonan mayor acceso na vivienda adecua adapta pa nan necesidad, manera cas di un solo piso of cu caracteristicanan di mobilidad. Ta bay promove desaroyo di comunidadnan specifico pa adulto mayor cerca di servicionan di salud y esencial, yudando nan mantene independencia.

Ta bay enfoca riba combati soledad y isolacion social entre adultonan mayor door di crea programa cu ta promove participacion social y den comunidad. Ta desaroyando centronan comunitario y club di actividad pa adultonan mayor unda nan por participa den deporte, arte, cultura y eventonan social. Pa esnan cu tin dificultad pa sali di cas, ta bay implementa programanan boluntario pa bishita y asistencia pa asina tur ta sinti sosteni y conecta na comunidad.

Ta bay implementa un sistema di transporte publico gratis y accesible pa adulto mayor, cu rutanan special cu ta pasa na hospital, supermercado y centronan di cuido. Ademas ta bay introduci un sistema di transporte on-demand, permitiendo adultonan mayor reserva biahe pa citanan medico of compras necesario, pa nan no mester depende riba otronan.

Tambe ta bay introduci legislacion y regulacion pa protege adultonan mayor di abuso y maltrato, introduciendo un sistema di monitoreo y reportahe pa detecta abuso rapidamente y interveni directamente pa protege individuonan vulnerable.