Savaneta ta caminda mi a lanta desde baby y caminda mi recuerdonan di infancia y hubentud a forma. Santo Largo ta mara na mi recuerdonan perfuma cu holor di lama, pisca, salinja y salo. E naturalesa ta unico, trankil y bunita.E area aki cu ta coriendo peliger na man di e Green Corridor. A drecha e caminda pa trafico cu ta pasa banda di e salinja, pero no a haci e duikersnan limpistrobando asina e fluho di e awa di salinja. E mangelnan a cuminsa muri y e awa ta mustra di ta contamina cu kimiconan.
Na e costa di e area aki tin un hotel cu a sera full e beach su dilanti caminda niun habitante no mag yega mas. Y no tin ni bista pa lama mas pasobra e hotel a lanta un muraya halto y full sera. Nos pregunta ta, hotelnan tin permiso di gobierno di haci doño di nos beachnan y lama?Di kita bista pa lama y daña e horizonte? Tambe tin casnan di 2 of 3 piso cu a wordo construi na e oriya di lama, tambe cu permiso di DIP? Si nos como pueblo haya un tereno den erfpacht of hasta si nos cumpra eigendom nos si ta wordo mara na reglanan. Atrobe por papia di, hancho pa inversionista, a costo di habitantenan, y smal pa pueblo.
Savaneta merece di haya e honor cu ta tok’e pa su bunita historia y como e prome capital di Aruba. Su contribucion na turismo sostenibel por ta substancial, si nos ubica nos Parke Marino Nacional eynan na Santo Largo y vecindario. ReD ta boga pa e projecto aki cu ta den su programa desde 2005, bira e forma pa salvaguardiay proteha e area unico aki y duna reconocimento na Savaneta.
Ta aconsehabel pa e parke aki wordo maneha door di un fundacion cu ta consisti di habitantenan di Savaneta cu tin amor pa Savaneta.ReD ta cumpli.
