Un bes mas Aruba ta den porta di un otro eleccion. Un bes mas nos ta asina leu cu nos como pueblo lo mester scoge nos representantenan. Un bes mas nos tin e poder den nos man pa dirigi e pais aki den e direccion cu nos ta desea di mir’e bay. Of esaki ta djis un ilusion y con e ta djis sinti? Manera tur aña di eleccion e ta bisto cu tin ‘algo’ sosodiendo ariba nos isla, e ta bisto ora nos core riba nos careteranan principal of hasta ora bo djis dal un buelta den bo propio bario. Hera bo no tin di sali for di cas mes, di leu caba bo por scucha un caravana ta acerca y un jingle di un of otro politico cu ta core campaña den weekend, ta resona.
Temporada di campaña ta manera un fiesta grandi, den forma gratuito practicamente tur weekend bo por ‘join the fun’ y bay gosa di e presentacion di bo artista of banda faborito cu 4 aña largo bo a paga pa bay nan fiesta. Great toch? Of no? Mi contesta ariba di esaki ta un big fat ‘no’! Y no solamente mi contesta ta un no pero mas y mas di mi fellow millennials ta vocifera di no ta cay den e tipo di ‘hype’ aki.
Pa mi sorpresa no solamente mi fellow millennials pero tambe sporadicamente mi ta haya mi mes den combersacion cu Baby boomers, Gen-X’ers y hasta e generacion cu a sigui nos, Centennials cu ta vocifera di no ta cay den e tipo di ‘trampanan’ aki mas. E frase nan mas comun cu mi ta scucha ta “ Nos ta mira e cosnan”, “Cambio mester bin” , “Nos no por wordo gaña mas”, “Nos wowonan si ta habri”. Awor, den algun momento mi ta wak rond di mi y mi ta realisa cu no ta tur mi fellow millennials ta ‘awake’ y tin di nan ainda ta cay pa e tipo di manipulacionnan aki.
Pero un caminda mas cu nunca mi speransa ta keda den mi generacion y e generacion cu a sigui nos pa e cambio cu tanto mester y cu nos ta anhela. Tin dia e tarea di trece cambio ta mustra manera un sero insuperabel, pero e ora ta keda mi nada otro cu duna mi contesta ariba mi propio pregunta cu cual mi a habri mi articulo cu ne. E no ta un ilusion, e poder ta den nos man, e poder pa dirigi e pais aki den e direccion cu nos kier mir’e bay ta di nos. The tides are turning! E cambio ta cuminsa na cada un di nos. Na cada un di nos pa sinta keto y den un manera critico y obhetivo analisa cada un opcion. E ta tuma cada un di nos pa deposita nos votonan unda cu realmente lo trece cambio, educa nos mes ariba e estado di nos pais y kico esaki kiermen pa nos futuro y esun di nos yiunan.
E ta tuma pa cada un di nos aporta cu nos granito di santo y trece den mocion e snowball-effect di cambio real y duradero. Si ainda bo no ta convenci cu e 1 voto cu bo tin por trece cambio, imagina bo cu si cada un di nos apropia di e berdad aki, cu e poder TA di nos y e pensamento y realidad aki ‘catch fire’. Bo 1 voto lo ta parti di un posibel 26.000 voto procedente di millennials y centennials.
Pero ami no por hacie mi so, mi tin mester di mi fellow millennials pa yuda mi enfatisa y vocifera e poder cu ta biba den cada un di nos voto. A yega e momento den e historia di nos pais cu nos como pueblo realisa cu cualkier gobierno ta depende di nos como pueblo y no nos como pueblo ta depende di nos gobierno. E poder ta den nos man! Nos ta e generacion di cambio!
