Trinta y ocho persona a ser deteni na America Latino y Europa, ora cu polis a desmantela un red di trafico di material pornografico di mucha, via telefon, Interpol y Europol a anuncia.
E operacion a ser coordina cu polis di Spaña hunto INTERPOL y Europol. E operacion aki tabata contra persona cu ta manda y intercambia potret y video pornografico, via whatsapp riba nan telefon.
Mas di 300 elemento manera computer, telefon, tablet, disco duro a keda confisca, pa asina analisa, den e operacion aki. Den e operacion a participa polis di 15 pais di America Central y Suramerica, Interpol a informa. E organisacion internacional di cooperacion policial INTERPOL tin sede na Lyon, na centro este di estado Florida.
E detencion y revision hudicial na cas a permiti haya diapositivo di almacenamento, cu hopi memoria caminda tabatin hopi potret pornografico, Europol a notifica den un comunicado. Total a realisa 38 detencion te awor na pais manera Argentina, Mexico, Colombia, Peru, Alemania, Italia, Portugal y Spaña.
Investigacion a cuminsa na 2016. Polis di Spaña a cuminsa cu un analisis via Red Tor, un sistema cu ta permiti pa investiga riba Internet di manera anonimo.
“Despues di haya prueba cla di un uso comparti di potret no decente”, e investigadornan a haya sa e relacion cu tabatin entre usuario di un grupo priva di whatsapp, Europol a confirma. “Cerca di 25 grupo riba telefon, integra cu un invitacion solamente ta someti na un analisis”, Europol a splica. Investigadornan a identifica mas di 130 persona sospechoso, durante analisis di varios archivo di inteligencia tocante e caso y nan implicacion.
Centenares di potret y video a ser comparti entre INTERPOL y Europol, via di database internacional di INTERPOL riba explotacion sexual di mucha. E material cu polis a haya ta bao revision, cu obhetivo di identifica e muchanan cu ta victima di crimen pa asina por salba nan di peligro, Europol a bisa den nan comunicado.
Den e operacion a participa Argentina, Bolivia, Chile, Colombia, Costa Rica, Ecuador, El Salvador, Alemania, Guatemala, Italia, Mexico, Paraguay, Peru, Portugal y Spaña.
