Lider di Partido RED Ricardo Croes a biaha pa Hulanda hunto cu dos otro miembro di Parlamento pa trata un tema importante. Sin embargo na final, Secretario di Estado Raymond Knops, sin motibo valido, a pidi pa para tratamento di e discusión den Eerste Kamer riba e asunto di Geschillenregeling.

Un delegacion di cuatro persona a biaha pa Hulanda, pa motibo cu  nan no kier a pospone e reunion riba peticion di Aruba door cu tin eleccion Parlamentario.

Croes a splica cu nan mester a realisa e biahe di trabou aki, mirando importancia di e tema di Geschillenregeling.

Na yegada inclusive, a duna ordo na delegacion di Corsou y Sint Maarten pa yega Hulanda pasobra tabata en espera di nan. P’esey nan a keda sorprendi ora cu di repente a pospone e reunion aki mirando e importancia di un geschillenregeling cu a pasa den Tweede Kamer caba.

Tur cos tabata cla, inclusive un reunion informal virtual a tuma luga despues di cual a pidi nan pone tur nan sugerencianan riba papel pa trece esaki den e reunion oficial.

Geschillenregeling, Croes a bisa den e conferencia, ta hopi importante pa pais Aruba. E organo aki mester cumpli cu tres criterio den su opinion pa e funciona como un organo cu por kere den dje. Na prome luga e mester ta independiente. Mester ta un organo cu ta trata interpretacionnan huridico y e conclusion mester mara tur partner na dje.

Despues di entrega di e concepto cu nan sugerencianan, a para e reunion di  Eerste Kamer. Ta importante pa lider di RED cu tur cuatro partner den Reino haya nan mes den e ambienda, cual no tabata e caso den esun di Tweede Kamer.

Di un banda e ta contento cu a para reunion, pero e ta hay’e fastioso cu no a para e encuentro ora cu Aruba a pidi. A logra papia cu Presidente di Eerste Kamer cu a bay den bon ambiente, unda a comparti su opinion riba  loke a pasa na Hulanda.

Relacion cu Reino

E lider di RED a bisa cu e relacion den Reino ta wordo stipula via di Statuut cu ta fiha jende ta traha Rijkswetten cu ta mara tur e paisnan na con pa traha cu otro. E leynan ta wordo traha di un forma cu e Minister Plenipotencario por entrega un obheccion si un Rijkswet ta bay en contra di interes di un di e paisnan. Na 2010 a agrega articulo 12A cu ta bisa cu mester bin un organo independiente pa tuma e decisionnan aki, cu no ta decisionnan politico. Den Staten Generaal tabatin mocion cu a wordo acepta door di mayoria. Pero den e ley nobo ta permiti Rijksministerraad by-pass decision di Raad van Staten cu ta trata Geschillenregeling. Esaki RED tin problema cu ne pasobra esey ta e problema, pasobra ta politiconan Hulandes ta interpreta e ley. E interpretacion mester wordo busca den Statuut. Hamas por bypass e organo door di ningun politico, segun Trias Politica, y esey  ta motibo cu RED ta para riba un comision independiente.