Diabierna atardi a tuma luga na Impact Hub Aruba e prome edicion di ‘Caribbean Journalism Seminar 2024’ cual a sirbi di escenario pa e lansamento di e prome asociacion di periodistanan profesional na Aruba ‘Red Arubiano di Prensa Profesional (RAPP)’ y a conta cu e presencia di un invitado internacional specialisa den periodismo investigativo.

Durante e seminario a conta cu un sala yen di periodista y invitadonan special cu kier a haya sa un poco mas di e temanan presenta durante prome evento di Red Arubiano di Prensa Profesional (RAPP) cu tabatin e participacion di speakernan special manera:

Luis Anibal Villegas: Ken a eherce como periodista na Aruba, na e momentonan aki ta traha como freelance y ta studiante di Ley na UVA na Hulanda, Villegas a presenta “Lob-generator” un herment pa habitantenan di e islanan di Reino Hulandes por solicita informacion publico mas facil.

Villegas, ken a traha pa Bon Dia Aruba tambe y ta esun cu a bin cu e reapertura di e caso di Poentje castro, a trece dilanti cu esaki ta un herment hopi valioso pa periodistanan y publico en general cu kier haya sa mas tocante informacion cu mester ta publico como por ehemplo: Contract di Eagle LNG, exploracion di gas na Aruba y entre otro, e investigacion cu e mes ta haciendo pa cu Hotel Secret’s na Baby Beach.

Marlon Kock ta un UX expert cu a elabora riba “Inteligencia Artificial y con periodistanan por us’e manera un ‘timemachine cu ta yuda den e produccion”.

Carla Minet (Keynote Speaker):

Ta un periodista investigativo cu a participa den investigacionnan importante manera Panama, Pandora y Paradise Papers, e ta fungi como director ehecutivo di Centro Investigativo de Periodismo na Puerto Rico y a presenta e tema “Retonan y Oportunidadnan pa periodistanan den Caribe”. Akinan Minet a splica e scenario actual na diferente pais den Caribe y e retonan cu periodistanan ta topa.

Red Arubiano di Prensa Profesional (RAPP) ta un organisacion ‘non-profit’ cu a ser crea recientemente y cu ta dedica na stimula e practica liber di periodismo y standard di comportacion etico.

E organisacion a establece su mes oficialmente como un asociacion siguiendo e guianan etico di e Asociacion di Periodistanan Hulandes (NVJ) y ta enfoca riba e periodista profesional como individuo

E mision di RAPP ta pa empodera tur periodista na Aruba a traves di derecho, educacion, y un compromiso na reporta eticamente, promoviendo un comunidad unda profesionalnan di media por colabora, innova, y mantene e standardnan mas halto di periodismo.

RAPP tin e vision cu den futuro prensa lo ta liber, responsabel y un refleho di e diversidad di e bosnan di Aruba.

E compas etico di RAPP ta guia pa cinco principio fundamental di periodismo etico:

1. Berdad y precision:Semper mester para pa precision, duna tur e hecho relevante cu tin, y sigura cu nan a ser verifica y ta confiabel prome cu publicacion.

2. Independencia: Periodistanan mester ta e bos independiente; no mester actua, formal of informalmente, na nomber di interesnan special ya sea politico, corporativo, of cultural. Mester evita conflictonan di interes y asegura transparencia den afiliacionnan.

3.Honestidad y Imparcialidad: Reporta imparcial ta construi confiansa y seguridad. Mester busca, selecta, y edita noticia di manera husto a la ves protehando fuentenan confidencial.

4. Responsabilidad: Ora cu ta comete eror mester coregi esaki y e coreccion mester ta sincero, no cinico.

5. Lealtad na Publico: Sirbi interes publico y pone e necesidad di e audiencia na prome lugar.

For di januari, e fundadornan di RAPP Melissa Stamper ken ta un periodista freelance y tabata fungi como hefe di redaccion na Amigoe algun aña pasa conhuntamente cu Andreina Morillo ken tin mas cu 6 aña trahando como redactor na Bon Dia Aruba y Yorleny Oduber cu ta traha na Diario pa mas cu 20 aña, a bin cu e idea di crea un colectivo pa asina profesionalisa prensa na Aruba cu ta hopi necesario. Nan a reuni frecuentemente pa asina yega na un vision conhunto y asina a nace RAPP cu e obhetivo di trata e desafionan actual den e sector di prensa na Aruba.

E fundacion di e organisacion ta refleha un compromiso pa promove excelencia periodistico, preparando e caminda pa un ambiente profesional cu mas cohesion y mas inclusivo.