Red Arubiano di Prensa Profesional (RAPP) ta reacciona tocante detencion di periodista: “Nos como asociacion ta boga pa trece mas guia y acuerdonan mutuo entre institutonan y prensa na Aruba”

Manera a bira conoci diamars ultimo, despues cu prensa tabata den un estado di tension henter dia pa motibo di aresto di minister demisionario Glenbert Croes, anochi a cera cu otro aresto: esun di periodista Marko Espinoza.

Video riba rednan social a circula mustrando Espinoza na boei. Informacion cu Bon Dia Aruba a ricibi ta indica cu motibo di e aresto tabata cu no a cumpli cu orden di autoridadnan pa stop di graba na Landsrecherche. Espinoza lo a bisa cu kier a saca potret di minister Croes cu boei na su man. Argumento di Espinoza tabata cu ta un sitio publico. Asina mes, el a keda deteni.

Pa esaki, Red Arubiano di Prensa Profesional (RAPP), como e asociacion pa periodistanan na Aruba dedica na stimula e practica liber di periodismo y stimula e standard di comportacion etico y ta alinea nan mes cu e asociacion di periodistanan Hulandes (Nederlandse Vereniging van Journalisten), a señala cu den caso aki, nan no ta tuma como nan tarea pa desaproba cierto publicacion of sistema di traha; tampoco nan kier dicidi ken por of no por eherce e trabao profesional di periodista.

Esey lo crea un drempel pa acceso liber na prensa pa tur hende, un punto di salida hancra den Aruba su Constitucion, algo cu nan ta para p’e y ta defende, esta libertad di prensa.

E detencion di un reportero diamars ultimo a limita e derecho di e periodista di colecta noticia liber, un derecho cu ta hancra den nos Constitucion y tratadonan internacional (Artikel 10 EVRM). Door di no a opta pa un acercamento menos drastico ta haci e detencion desproporcional, pa motibo cu a limita e derecho di colecta noticia liber mas cu tabata necesario, algo cu nos como asociacion ta desaproba pa motibo cu e ta mina libertad di prensa.

“P’esey nos como asociacion ta boga pa trece mas guia y acuerdonan mutuo entre institutonan y prensa na Aruba pa asina por keda eherce e trabao di periodista liber. Como asociacion nos kier percura pa e puntonan di salida basico, e guia internacional di etica periodistico (Code van Bordeaux) y e principionan di RAPP, sirbi como base pa eherce e trabao di periodista. Na final tur medio y tur periodista tin cu carga nan responsabilidad y esaki ta pa mantene nan mes na ley, na e limitenan di sociedad y tambe na loke e mesun publico ta spera di nos,” E asociacion conforma pa Melissa Stamper, Andreina Morillo y Yorleny Oduber a indica ayera den un comunicado pa prensa.