E partido blanco, ReD Democratico ta e partido cu ta para na tur momento pa derechonan humano. E grupo di nos comunidad cu sin mas nos ta para pe ta nos hobennan. Tur mucha
tin derecho riba educacion. Na scol pero tambe na cas. No ta importa si e ta legal of ilegal. E punto ta cu e ta un mucha. E no a pidi pa ta ilegal. Ademas ningun sociedad ta gana algo cu mucha y hobennan analfabeto of sin scol.
Esey ta traha cuna pa criminalidad. Nengando e mucha y e hoben su derecho riba educacion ta bay contra mi consenshi, mi sentido di ser mayor y di ser un Arubiano husto.
Pero atrobe e otro banda ta cu e mucha Arubiano no mag wordo perhudica. Scolnan no mag bira demasiado grandi. Door di yena klasnan cu mas di 30 mucha automaticamente e calidad di enseñanza ta baha. Of nos muchanan no por bay scol den nan mesun bario. Costo di material y mantencion di scol ta subi y ta come parti grandi di e presupuesto pa enseñanza. Cual ta destina primeramente pa hisa e calidad, pa inverti den upgrading di e maestro y docentenan. Pa mehora e curriculum y stimula creatividad na scolnan pa haci e enseñanza mas bibo y
actual. Pa e.o. crea fondo di buki y implementa Club Escolar den futuro cercano. Pa zorg cu e leerplicht ta ser respeta y cu tin control estricto. E solucion pa menos mucha of hoben ilegal na Aruba ta simplemente di zorg pa miho control riba entrada di stranhero y boetnan pisa pa hendenan local of propio paisanonan cu ta contribui y hasta gana placa cu trece hende
aden ilegalmente cu tur su consecuencianan pa nos mes muchanan. ReD Democratico den su programa di gobernacion bou di e punto III. ENSEÑANSA ta fiha e.o. cu:
Enseñansa ta un derecho universal y constitucional. P’esey educacion ta un di e puntonan cardinal cu ReD ta duna contenido husto y sincero na dje. Educacion ta fortifica e recurso primario mas importante cu pais Aruba conoce, su hendenan. Educacion ta e fundeshi cu ta brinda un base structural y sano na nos muchanan, nos hobennan y como tal na nos comunidad y su futuro. E nivel averahe di educacion di pais Aruba ta abao compara cu e paisnan mas desaroya. – Minimal 6% di nos entrada bruto nacional lo keda destina pa enseñansa conforme recomendacion/ exigencia di UNESCO; – ReD lo determina y destina un porcentahe fiho, mas halto cu 6%, pa 5 aña largo, unda e falta di inversion pa añanan largo den enseñansa lo keda coregi. Despues esaki porkeda 6%. Y lo studia e modeloescolar di Finlandia cu ta uno hopi innovativo y exitoso; – Duna Papiamento su luga mereci den enseñansa, banda di otro idioma; – Duna scolnan (publico) mas autonomia riba maneho di finansa; – Implementa maneho di ‘Calidad Total’ na tur scol (inspeccion di Enseñansa); E programa ta extenso. Y locual ta sigur ta cu cada nivel di enseñansa lo haya atencion: scol preparatorio y basico; enseñansa secundario, profesional, superior, special y scol pa adultonan.
ReD ta di opinion cu innovacion den enseñansa no por sosode sin tecnologia di informacion y comunicacion. ReD ta boga pa introduccion integral y cu prioridad di ICT den ense-ñansa: recapacita tur docente/ maestr(a) riba uzo di computer den enseñansa y tecnologia moderno cu a bira indispensabel. Cada docente mester dispone di un computer (notebook/laptop) na
scol. Mester percura cu na scol e muchanan por dispone di un notebook /laptop. Esaki sinembargo por ta e caso solamente despues di prepara e infrastructura di scolnan y pone e exigencianan aki, e.o. proteccion contra robo, instalacion di coriente adecua. Beca di calidad: Tur aña ta duna beca di estudio entre otro den ramo turistico/ hospitalario, salubridad, industrial – petrolero, financiero economico, international business, social cultural como incentivo pa e miho studiantenan di Aruba. E becanan por ta pa estudio na Aruba mes tambe. Esaki lo tin efecto positivo ariba esfuersonan escolar di studiantenan y a lo largo pa nos comunidad.
