RED a bin cu cambio den nan statuto: Kinsasha Thielman-van der Bliek presidente nobo directiva di RED

Diadomingo ultimo partido RED Democratico (RED) a tene su reunion anual di miembresia. Esaki a tuma luga di forma virtual mirando e retonan cu nos comunidad y mundo henter ta pasando aden pa motibo di Covid.

Minister Rudy Lampe apunta pa partido RED den e gobierno di coalicion actual (MEP-POR-RED) a bisa cu esaki ta un forma pa mustra e pueblo votado cu nan ta un partido “responsabel, consistente y serio.”

Directiva nobo

El a bisa cu den e reunion aki cu nan miembronan a keda eligi un directiva nobo den cuadro di eleccion general venidero na 2021. Como presidente a keda Sra. Kinsasha Thielman-van der Bliek. Lampe a bisa cu RED ta sumamente contento di por tin mas participacion di hende muhe den politica. Pero tambe di mas hobennan interesa den politica. Igualmente como secretario a keda nombra Thomas Ruiz kende tabata e presidente saliente y como tesorero a keda Stefano Croes, y como comisario, sin niun cargo den e directiva, a keda Sr. Ricardo Croes kende ta lider di fraccion di RED y tambe minister Rudy Lampe mes. Esaki ta e directiva di cinco persona cu ta bay guia e partido RED den e aña electoral proximo.

Presidente nobo di RED Democratico, Sra. Thielman-van der Bliek a expresa cu e ta ‘sinti un honor y tambe humilde di a wordo duna e confiansa pa carga e responsabilidad como presidente di e directiva di RED Democratico’.

El a bisa cu e tin diferente idea locual por hiba nos pais den un diferente direccion tambe. Pero e ta para pa un politica nobo cu nan partido kier mira den nos pais tambe. “Cu ideanan nobo, cu visionnan nobo y sigur pa mira pa futuro,” Thielman-van der Bliek a bisa.

Cambio den statuut

E miembronan di RED a dicidi cu nan ta bini cu un cambio den nan statutonan. “En todo caso e cambio di statutonan aki no ta cambio di nos principionan,” Lampe a bisa.

Nan a yega di haci un cambio den nan statutonan na 2010 caminda nan a lanta e prohibicion caminda nan candidatonan no por a bira ministeriabel pa haci crea mas consistencia pa loke ta atraccion di nan candidatonan riba lista. Awor 10 aña despues nan a bin cu otro cambio, caminda nan miembronan a dicidi pa kita otro prohibicion for di nan statutonan.

Nan statutonan tabata prohibi pa un parlamentario of minister por ta miembro di directiva di partido RED. Pero a base di experiencia di e ultimo añanan den gobierno nan a ripara cu ta importante pa tin un dialogo continuo y harmonia entre esnan cu ta representando RED den Parlamento, den ministerraad y den directiva di e partido. Nan a kita e prohibicion aki mirando cu cambionan ta tuma luga y nan mester adapta na e cambionan aki.