Recuperacion economico… Den tur aspecto?

No por tabatin diferencia mas grandi e siman aki, cu entre e berrinche callejero den parlamento y e charla di presidente di CAft tocante nos estado financiero. Mientras e panorama economico-financiero di nos pais, algo supuestamente superimportante den debate di presupuesto, a bay completamente perdi den e guera di trinchera aki, diamars anochi e organo di supervision financiero a duna un analisis extenso di unda nos ta para como pais. Aunke mayoria di e publico cu a acudi ta persona bon informa y consciente di e gravedad di e situacion, e pregunta grandi ta keda si e problematica complica aki ta yega na e capanan amplio di nos poblacion. Ta parce mas bien cu cada ken ta reacciona segun cu e situacion nacional ta toca nan personalmente so. Pa gran parti esaki ta di comprende tambe; no ta asina facil pa un ciudadano comun y coriente bay dedica tempo na analiza e situacion ey, mientras su preocupacion individual ta con sobrevivi den e actual situacion.

Nos no mester lubida cu, aunke e cifranan ta mustra un recuperacion economico, encabeza pa turismo, ta realidad tambe cu e recuperacion no den tur aspecto ta duna e mesun impresion. E cifranan di por ehemplo SVb ta duna un indicacion cla. Asina nos a sali di e punto mas abao na 2020 pa loke ta trahador y cupo di trabao registra, y na fin di 2021 y den e ultimo lunanan ta mira un aumento gradual den e categorianan aki. Sin embargo, ainda tin 1.623 empleado menos registra dia 1 di april 2022, compara cu 1 di januari 2020. Y den cupo di trabao por mira cu tin 1.372 cupo menos na april 2022 cu na januari 2020.

Durante e presentacion di prof. Gradus e mes a haci e pregunta con por ta cu ta mira un recuperacion economico asina fuerte, mientras den entrada di gobierno casi no ta mira esey. Nos no ta haya esey un misterio. Por ehemplo loonbelasting a keda atras pasobra reactivacion di empresa no necesariamente a bay man den man cu tuma mas personal. E pandemia a siña hopi empresario con pa haci hopi cu poco personal. Pa fortifica e conclusion aki por mustra riba e cifranan di BBO, cu sí ta refleha e mehoracion economico aki y ta na nivel pre-Covid atrobe na fin di 2021. En general ta mira un recuperacion economico, pero cu den empleo esaki no ta e caso.

Esey ta un preocupacion, cu ta bira mas grandi cu lo siguiente: presencia di un forza laboral grandi no documenta. Durante e debate di presupuesto nos Promer Ministro a ripiti e conocido cifra di alrededor di 15.000 persona indocumenta, di cual nos ta supone cu gran parti ta di nacionalidad Venezolano. Si esey ta e caso, y nos mester conclui cu e hendanan aki tin dak riba cabez y cuminda, anto mester supone cu hopi di nan ta traha pero no den legalidad. Nan por lo tanto no ta contribui na fondonan di impuesto y seguro social y ta duna e impresion cu un parti demasiado grandi di nos economia ta keda den scur y no ta contribui… Pakico esaki ta importante? Pasobra gobierno ta sigui cobra e empresanan registra y bon conoci tur cos, mientras no tin vista riba un plan pa baha gasto di negoshi, y tampoco tin un plan conoci pa duna inicio na combati ilegalidad na un manera structura. Ta bunita cu ta logra establece un autoridad pa stimula competencia igual, pero no ta cuestion di institui tal autoridad so. E parti duro ta keda pa obliga e instancianan gubernamental cu tarea investigativo y di sancion pa coopera, y no sabotea, trabao di otronan.

Bolbiendo na e nivel general di desaroyo economico di e proximo añanan, a bira bon cla cu (taba)tin un diferencia clave di opinion tocante e idea di Hulanda (surplus presupuestario na 2023) y e plan di gobierno pa prolonga deficit te cu 2024. Den parlamento e promer mandatario a duna di conoce cu lo bay pa e surplus otro aña, pues por supone cu en todo caso momentaneamente a baha cabez pa Hulanda. Sin embargo, cumpli cu e tarea, independiente di e gana o falta di esaki pa hacie, no ta nada facil. Si tabata pensa inicialmente di core un deficit di mas di Afl. 100 miyon na 2023, a pesar di cu impuesto indirecto – pa gran parti e BTW nobo – lo trece un aumento nunca visto den e tipo di impuesto aki, di 2% di deficit pa 1% di surplus ta mas di 150 miyon florin pa corta. Pone acerca e pesadiyanan di seguro social y cuido medico, anto por conclui cu dolor di cabez no a kita pa gobierno, cu o sin paracetamol paga pa AZV o di bo mes cartera…

Straño ta cu e aspectonan aki di nos situacion financiero practicamente no a bon dilanti den e debate riba presupuesto… Ta parce cu keto bay parlamento no ta e lugar pa haya sa mas di e asuntonan aki, clave pa nos futuro. Di otro banda, esun cu kier shop tocante ‘ken a lastra riba caya cu ken, ken a drumi cu ken, ken a horta hunto cu ken, ken a faborece mas amigo y famia’, anto sí parlamento ta parce nos ainda un fuente insuperable di informacion mezquino. Pero, pa esey ta necesario paga cada un di nan e salario di cinco cifra dilanti coma?