Recuperacion economico, cambio di direccion politico y dialogo; Puntonan paralelo entre partido AVP y RAIZ, MAS y Accion 21

AVP tabata e di prome partido politico cu mester a reuni cu Gobernador. Lider di AVP, Mike Eman ta gradici e comunidad di Aruba pa e sosten cu partido AVP a ricibi durante ultimo eleccion.

Segun Eman, e tabata un eleccion cu hopi reto, pero e candidatonan y activistanan a traha duro y por bisa cu awe partido AVP un bes mas a supera den momentonan di hopi reto y pone un posicion hopi cla pa forma parti di e Gobernacion di e pais Aruba. Pero tambe forma parti di e proceso politico importante cu Aruba ta den espera di dje.

Partido AVP a prepara su mes grandemente pa por tin e capacidad den cas pa por maneha e retonan grandi cu Aruba ta para dilanti di dje y a prepara un plan den consulta cu comunidad y ayera 29 di juni 2021 a comparti cu Gobernador.

Eman ta mira cu partido AVP por forma parti di un gobierno cu e partidonan cu a mira como partidonan nobo cu a haya asiento den parlamento. Ta trata aki di partido RAIZ, MAS y Accion 21.

Eman ta kere cu partido AVP y e partidonan chikito a para pa un cambio, un cambio di e Gobernacion cu tabatin ultimamente. Segun lider di AVP cada un di e lidernan a articula cu mester bin un cambio, cu mester cambia e direccion di e pais, unda cu enseñansa mester di sosten, y salubridad publico no mag di bira victima di e retonan cu e pais ta pasando aden.

Loke tambe tin mester ta dialogo den nos pais, y tur cuater partido a articula e pensamentonan aki. Y tur cuater partido tabatin hopi preocupacion cu a maneho di friends and family di ultimo añanan, caminda cu hopi placa di nos comunidad en bes di keda inverti den enseñansa, salubridad publico y mehoracion social, no tabata bay den e direccion aki.

Segun Lider di AVP, riba e puntonan di recuperacion economico, cambio di direccion politico y dialogo den nos pais, unda cu ta duna prioridad na nos economia, tin hopi paralelo entre partido AVP y e partidonan cu a saca nan mes den e eleccion aki.

E mensahe di cambio tabatin un acogida amplio den comunidad. Por bisa cu for di e 12 asiento, esunnan cu a pidi pa un cambio di direccion na Aruba ta esunnan cu a pone nan confiansa den partido AVP y RAIZ, MAS y accion 21 y aki sigur ta mira e posibilidad pa forma un gobierno.

Lider di partido AVP ta kere cu gobernador por scoge pa forma dos informador, uno cu ta explora e posibilidad di partido MEP y partidonan chikito y si e partidonan chikito ta desea esey; y e otro ta un informador cu ta explora e posibilidad di un gabinete AVP, RAIZ, MAS y Accion 21.

Esaki ta un di e puntonan cu a comparti cu Gobernador, mirando cu tin un urgencia pa tin un gobierno nobo unda cu tin cu cambia e direccion y drenta den dialogo cu Hulanda, cu tin hopi tema cu si nos no yega na dialogo constructivo cu Hulanda, ta keda puntonan di dolor.

Segun lider di AVP, na e momentonan aki ta colga riba cabes di gobierno di Aruba cu mester corta 60 miyon den salubridad publico. Esey lo kiermen eigenbijdrage y kita remedi atrobe. Sinembargo, lider di AVP ta kere cu e temanan aki mester bay back Hulanda pa asina atende cu nan. Pero e gobierno di signatura di partido MEP a practicamente acorda e temanan aki caba, unda cu mas sufrimento ta bay tin pa pueblo si Aruba sigui den e direccion di e gobierno di signatura di partido MEP.

Aruba no lo haya e cambio pa cual cu e la vota dia 25 di juni. Lider di AVP tabatin comunicacion cu e partidonan chikito pa asina sondea posibilidadnan, pero no a sinta oficial ainda. Sinembargo, loke por scucha rond ta sinti cu lo ta habri; pero no tabatin reunionnan oficial. Pa loke ta trata partido MEP, segun Eman, na momento cu MEP a exclui AVP no tin nada mas di papia.