Parlamentario Endy Croes a amplia riba recuperacion di Aruba y mas specifico riba e recuperacion den e area di turismo. Na un manera sorpresivo por a tuma nota di un desaroyo hopi mas positivo den e area di turismo cu tur hende a anticipa. Manera ta conosi cu turismo ta e pilar number uno di nos economia y ta percura pa alrededor di 80% di actividadnan economico di pais Aruba. Expertonan tanto rond mundo y local a calcula inicialmente cu e mercado di turismo lo yega bek na su capacidad y cifrasnan di 2019 ( cual tabata e aña record) te na aña 2024. Sinembargo turismo na Aruba a dal un buelta hopi alentador contrario na tur e prognosticonan.
Recuparacion cu mas velocidad ahusta di 68 pa 70%:
Recuparacion den area di turismo a cuminsa crese cu velocidad mas cu a anticipa. Pa e rasonnan aki expertonan a ahusta recien e recuperacion cu tabata proyecta pa alkansa 68% na final di aña 2021 awor pa 76%. Mester tene cuenta cu e promer 4 a 5 lunanan di aña tabata mucho mas slow pero desde Juni enadelanti y e prognosticonan desde Juli pa december ta alentador y esaki ta e motibo basa riba e outlook aki a ahusta e porcentahe . Na juli tin indicasion cu Aruba lo ricibi 92 mil turista di cual na 2019 esaki a alkansa 100 pa 110 mil pa luna. Alaves segun informacion pa e ultimo kwartal di 2021 Aruba lo ta coriendo riba 102% di ocupacion. Pues practikamente sold out.
Turistanan ta gastando mas y ta kedando mas largo:
Otro ingridientenan positivo pa Aruba cual ta resalta ta e hecho cu e turistanan cu ta bishita Aruba despues di re-apertura desde 10 di Juli 2020 enadelante ta gastando mas pa persona y ta kedando mas largo. Alaves como 60% ta trata di turistanan nobo cu no ta repeat guest. Informacionnan aki ta hasi e mercado aki interesante. Nos a logra confirma cu turistanan aki ta lagando minimo 2 biaha mas hopi “tips” atras pa esnan cu ta traha directamente den e sector aki. Diasabra ultimo a yega un total di 4570 turista cual ta ilustra y sostene e cifrasnan y prognosticonan cu ta wordo duna. Finalmente nos kier felicita gobierno den e proceso pa cu un maneho excelente yegando 69% di vacunacion cual tambe ta forma parti di e exito den wowo di e turistanan pero tambe desde dialuna 5 di juli 2021 hopi di e medidanan di covid 19 a wordo elimina cual sigur lo hasi Aruba e lider den region compara cu nos competidornan. Pabien Aruba y Pabien pueblo. Cu boso disciplina cu boso a desplega y cu tur e trabounan duro di nos frontliners alaves e desicionnan desisivo y na ora di Gobierno di Aruba lidera pa nos Promer Minister Evelyn Wever Croes nos a logra e exito aki. Un danki di curason! Ban yuda mantene nos motornan cendi esta lokual nos tin cu ta di nos. Nos Turismo!
