Conectividad interno ta un reto cu mester surpasa pa cumpli cu necesidad di Aruba
Universidad di Aruba lo introduci un structura nobo pa maneho y esaki ta esencial pa e instituto cumpli cu su funcion pa brinda educacion academico di nivel y sirbi comunidad di Aruba. Asina Rector saliente di Universidad di Aruba, dr. Glenn Thode a bisa Bon Dia Aruba.
Banda di su trabou como Presidente di Conseho Electoral, Dr. Glenn Thode ta poniendo e ultimo tokenan pa traspasa su encargo di Rector di Universidad di Aruba pa su reemplasante. Durante un combersacion cu Bon Dia Aruba, Thode a bisa cu su periodo na Universidad di Aruba tabata largo. “Mi a drenta na 2012 cu algun aspiracion y soño cu mi kier a realisa. Mi a hasta pone esakinan como condicion prome cu mi a asumi e responsabilidad,” dr. Thode a comenta. “Lo mi no a tuma e tarea si mi no a haya espacio pa realisa kico mi tabata kier. A priminti mi e posibilidad, pero en realidad mi no a hay’e.”
Thode tabata y ta kere den e filosofia di Serving Leadership, esta cu personanan cu ta lidera mester haci esaki pa sirbi comunidad. Aunke e no a logra henter su vision, e ta contento si cu den su añanan como Rector, el a logra haya algun bon partner den Universidad di Aruba. “Mi por a traha pa realisa parti di e soñonan cu mi tabatin. Nan a bin un poco mas laat cu locual mi tabata kier, den otro forma cu mi tabatin gana y premira, toch mi ta contento di por a contribui na adaptacionnan na Universidad.”
Falta di conectividad entre facultadnan
Sinembargo pa motibo cu Thode a bolbe Universidad como su dirigente, keriendo cu e por a aplica su filosofia, el a haya su mes confronta cu dificultadnan pa eherce su vision den e forma con tabata administra e instituto academico. E tabata confia den e promesanan haci na dje. “Mi tabata depende di otro hende pa realisa un vision comun pa Universidad di Aruba. Pero mi mester tabata sa miho, pasobra esey tampoco a pasa na Boneiro.”
Kico specifico no tabata cla, pero e falta di cumplimento cu locual Dr. Glenn Thode a spera pa por haci Universidad di Aruba realmente un instituto cu no solamente mester brinda estudio academico na studiantenan pero tambe mester sirbi como centro di conocemento y guia pa comunidad, no a keda concretisa.
Y e no ta punta dede solamente riba e Colegio di Curatornan cu a tum’e den servicio pero tambe henter e structura di maneho di Pais Aruba. “Internamente e instituto tin su retonan, pasobra con cu bay bin, structura di Universidad di Aruba ta uno basa riba un organisacion fragmenta, unda e facultadnan ta para practicamente riba nan mes.” Un construccion di facultadnan relativamente independiente cu un maneho central ta pone cu no tur ora e liñanan di pensamento ta core mescos. “Mester tin un sorto di centralisacion di cierto aspectonan.”
Y ta riba e area aki cu dr. Thode a bisa cu e tabata ricibi cierto oposicion for di facultadnan. “Ta academiconan ta traha na Universidad di Aruba y den e facultadnan. Berdad nan tin autonomia, pero ta trata aki di autonomia academico. Mester tin e garantia aki tambe. Pero nan no ta autonomo riba nivel di administracion y maneho. Un facultad no ta un entidad para su so. E no por actua riba su mes.” E identidad legal ta Universidad di Aruba y no un di e facultadnan y aki ta unda cu Dr. Thode a sinti cu falta mas claridad riba e responsabilidad di cada uno. “A tuma mi hopi aña pa convence e facultadnan cu mester di un maneho centralisa.”
Maneho coherente banda di facultadnan academicamente independiente
Segun Thode, pa tal motibo mes a enfoca pa busca un reemplasante cu tin e capacidad pa dirigi, cu experiencia administrativo. “Ya cu pa mi e retonan mas grandi tabata riba e tereno di administra e institucion, con e ta opera, mi ta kere cu esey ta conta tambe pa mi reemplasante. P’esey mes a busca un hende cu tin experiencia riba modelo administrativo di un Universidad.
Pero pa logra e cohesion, hasta cu un Rector nobo cu experiencia riba e tereno, Colegio di Curatornan, esta e organo cu ta supervisa Universidad di Aruba mester traha cerca cu decanonan pa hunto por realisa un maneho administrativo cu ta traha na interes di e instituto mes. “Decanonan y academiconan ta bon den argumento cu ta hopi convincente, aunke cu no ta yuda den e maneho di e instituto.”
Pensamento poco flexibel ta mara na Reino
Pa Thode no ta facil pa expresa su mes critico di un instituto na cua el a dedica 32 aña di su bida. Prome como studiante, despues como docente y finalmente como Rector. “E (Universidad di Aruba) ta un vehiculo pa trece hende hunto pa logra un meta comun. Y pa logra esaki, hendenan cu ta maneha e vehiculo cu ta entre otro e facultadnan y academico mester traha hunto.”
Pero locual Thode a observa ta cu pa tur cu ta traha na Universidad di Aruba y tin e preparacion Hulandes ta menos habri pa cambio y traha hunto, irespecto e facultad. E ta ripara cu e problema ey no ta existi ora ta trata di Profesornan Mericano cu ta bin duna les periodicamente na Universidad di Aruba. E academiconan Mericano ta mucho mas flexibel den nan acercamento cu otro.
“Esey ta mi analisis den tur mi funcionnan, incluso esun di Gezaghebber na Boneiro. E aspecto aki di un sistema educativo cu nos tur a pasa aden ta crea cierto obstaculo. Pero nos ta ripara cu trahando cu University of South Carolina, y tambe Universidad di Leuven di Belgica cu tin un otro manera pa interactua cu otro.” Thode a bisa cu e facilidad con academiconan di Leuven por comunica cu tur facultad ta ilustrativo cu Universidad di Aruba por yega na bira un instituto habri unda tin un fluho di conexion y comunicacion interno cu ta yuda eleva e calidad di educacion academico di un banda, pero tambe sirbi comunidad cu datonan crucial. “E interaccion cu academiconan di Belgica ta totalmente diferente cu e interaccion cu personanan di Reino. Aki no ta haci un diferencia di ta un profesor Hulandes of un academico di Aruba. Mayoria cu ta studia na Hulanda tin un tipo di pensamento cu ta stroba un colaboracion y interaccion cu ta pasa di facultad pa facultad y Thode no por a trece cambio den esey. Sinembargo, presencia di e partnernan di Merca y Belgica ta sirbi como ehempel cu un cambio di pensamento no solamente ta necesario, e ta hasta hisa e satisfaccion cu e trabou. “Si no cambia e pensamento, nos lo no stop di ripiti e mesun patronchi.”
A planta simia
Pa e motibo ey mes, e Rector nobo lo mester haya ayudo pa realisa un maneho coherente di Universidad di Aruba, pa bira e instituto cu Aruba mester.
Aunke cu e no a logra tur locual e tabata kier, sigur no mesora, Glenn Thode ta contento si di a mira con Universidad di Aruba a crece. “Mi a planta algun simia, y aunke mi mes no a implementa nan, otro a tuma encargo y a sigui cune. Tuma por ehempel e concepto di ‘Mindfulness,’ esta e filosofia pa ta hopi consciente di locual ta rond di bo, ta activo na Universidad di Aruba. No ta ami a implement’e, sino otro. Y mi ta contento di wak cu e t’ey. E ta incorpora den e diferente programa y actividadnan. Nos tabatin hasta un persona cu banda di duna les tabata duna yoga riba Dialuna. E persona a bay, pero e programa di enfoca riba conscientisacion a keda, y pa esey mi ta contento.”
Universidad di Aruba tin un potencial hopi halto pa Aruba, y unicamente si traha hunto, por logra cu e instituto berdad por cumpli cu e funcion di sirbi comunidad di Aruba mientras cu ta lidera e procesonan pa medio di su programa academico.
Dr. Viola Heutger mientrastanto lo asumi e funcion di Rector di Universidad di Aruba entrante 1 di Juli, reemplasando asina dr. Glenn Thode. Dr. Heutger tin amplio experiencia rond mundo, incluso na Corsou y St. Maarten y tin e tarea pa sigui cu programanan di innovacion na Universidad di Aruba.
