Rector nobo pa Colegio Arubano: Un Rector Hulandes por wordo paga mas cu un local

Presidente di Stichting Middelbaar Onderwijs Aruba (SMOA) su Hunta di Supervision, sr. Baart Kool ta splica Bon Dia Aruba cu ta berdad cu un Rector cu bini for di Hulanda por haya salario mas halto cu un Rector local pero cu tin varios cos cu ta hunga un rol den esaki.

Segun sr. Kool, normalmente den averahe, na Hulanda ta paga mas pa posicion di Rector cu ta paga akinan na Aruba. ”Si e candidato ta fit cu e profiel cu nos ta exigi y nos kier pa e candidato bini Aruba, a lo menos nos tin cu purba yega cerca di paga su persona locual e tabata gana eynan ” , sr. Kool a splica. Den e caso di drs. Hans Timmermans, SMOA a logra di paga sr. Timmermans e suma cu e tabata gana na Hulanda cu a resulta di a surpasa loke tabata paga rectornan local aki na Aruba.

Tur cos ta depende un tiki riba e profiel

SMOA a haya un carta for di organisacionnan di e mayornan ”Ouder Commissie Colegio Arubano” (OCA) caminda nan ta bisa cu pa nan calidad ta mas importante pues nan no ta importa for di unda e candidato ta bini. Esaki tambe ta enfasis di SMOA pa busca un candidato di calidad y cu ta fit cu e profiel. Tambe den reunion cu docentenan, Departamento di Enseñansa y otro instancianan e siman aki ta spera di adelanta e proceso pa selecta un rector nobo.
E proceso mester cuminsa prome cu trahamento di profiel, basa riba e profiel aki hendenan cu ta interesa por aplica y ora cu tin suficiente candidato ta cuminsa selecta y analisa con cerca nan ta yega di e profiel cu SMOA a pone riba mesa. For di esaki ta yega na un seleccion un tiki mas chikito cual lo conoce e comision, papia cu e mayornan y for di eynan ta cuminsa cu e seleccion oficial.

”Mi ta spera cu e siman aki nos por finalisa e profiel, pa nos por pone advertencia den corant. Nos ta duna nan 3 siman, y riba 1 di Mei nos por cuminsa selecta. Con lihe esaki por bay ta depende na cuanto candidato bin inscribi” , sr. Kool a bisa.

 ”Desde di 1 April,  drs. Hans Timmermans no ta den servicio mas manera Rector di Colegio Arubano y esaki ta duna nos e obligacion segun statuto pero tambe e posibilidad pa nos busca un otro candidato”, sr. Kool ta sigui splica. Mester traha un profiel caminda ta para e exigencia, competencia y caracteristica entre otro di e persona cu bo ta buscando. Actualmente SMOA ta acercando diferente luga manera Departamento di Enseñansa, Inspecteur di Ensenansa, Despacho di Minister pa haya mas informacion cu ta posibel for di nan pa e ora ey completa e profiel. Asina ki por haya un profiel cu tin sosten mas amplio cu ta posibel cu e intencion pa cuminsa haci advertencia pa hende por aplica. 

 ”Probablemente den transcurso di luna di Mei caba nos ta bay haci nos prome seleccion cu por ta basa riba un combersacion of riba e carta di aplicacion cu e ora ey nos lo purba di selecta y yega na un cantidad di candidato potencial, y for di esaki nos ta sigui na un seleccion mas profundo. OCA a bisa bon cla cu e Dirigentenan Escolar cu ta encarga actualmente ta haciendo un tremendo trabao. Aworaki e enfasis ta riba e obligacion di e Hunta di Supervision tambe pa purba di yena e funcion di rector mas lihe cu ta posibel” , Sr. Kool a splica.