(NLTimes) – Un recorte grandi na e presupuesto pa educacion superior na Hulanda ta dañando reputacion internacional di e pais, segun Tim van der Hagen, rector di Universidad di Tecnologia di Delft. Papiando cu Financieele Dagblad, Van der Hagen a adverti cu e e cortamento di 1.2 biyon euro cu gobierno tin planea lo forsa universidadnan Hulandes pa tuma “decisionnan doloroso” y lo pone e reputacion global di academia Hulandes den peliger.

E situacion aki ta surgi na un momento cu minister di Educacion, Eppo Bruins (NSC), ta planea di ricibi un fondo special pa atrae cientifico internacional di nivel halto, particularmente esnan cu ta huy for di Merca pa motibo di politicanan di educacion di Trump. Gobierno Hulandes a anuncia e iniciativa aki recientemente y a encarga e Nederlandse Organisatie voor Wetenschappelijk Onderzoek (NWO)cu maneho di e fondo.

“Hulanda ta un pais cu ta depende hopi ariba colaboracion internacional,” Van der Hagen ta bisa. “E perdida di reputacion por haci mas daño cu reduccion di fondo mes.”

Ayera Eerste Kamer a debati e recortenan planea. Esaki ta inclui reduccion di esfuersonan di internacionalisacion den universidadnan Hulandes y limitacion di uso di Ingles den educacion. E politicanan nobo aki a cuminsa tuma efecto, cu un disminucion den cantidad di studiante stranhero cu ta aplicando pa studia na Hulanda.

Reduccion di fondo ta hacie mas dificil pa institucion Hulandes atrae y retene investigadornan di nivel halto. Van der Hagen a indica cu academiconan prominente di afor awor ta hopi mas reserva pa opta pa trabou na Hulanda, mientras cu expertonan cu ta trahando na Hulanda pa hopi aña ta buscando oportunidad na otro pais.

“Coleganan cu a traha aki pa hopi tempo ta sinti cu nan no bon bini mas. Como consecuencia, nan ta busca oportunidad otro caminda. E daño na e reputacion cu nos a sufri ya caba lo afecta ciencia na Hulanda pa hopi aña,” el a bisa.

A pesar di e creencia cu e fondo nobo lo yuda, universidadnan ta sinti e presion financiero di e reduccion. Algun institucion a cuminsa corta trahadornan, mientras cu Universidad di Delft a ordena cu tur departamento mester reduci nan presupuesto cu 10%, segun Van der Hagen.

E recorte den educacion ta bin den un periodo caminda gobierno Hulandes, lidera pa un coalicion derechista, ta pone enfasis ariba reduccion di cantidad di studiante internacional den e pais. Aunke oficialnan ta bisa cu esaki lo alivia presion riba vivienda y servicio publico, lidernan di universidad ta alerta cu e politica aki ta di bista cortico y por yega na debilitacion di output di investigacion y e influencia academico global di Hulanda.