Cu gobierno no lo contesta…

Nos ta den e recta final pa eleccion dia 22 di september. Den e simannan aki lo tin varios pregunta di cual nos ta anticipa cu nan lo no haya contesta. En todo caso no di banda di gobierno. Pero por ta cu informacion lo por yega di otro banda, pa e publico votado haya un claridad di tur manera.

Incertidumbre por ehemplo tocante e estado den cual e rehabilitacion di e refineria ta. Sigur despues di e ultimo noticianan cu gobierno di Merca a tuma mas medida contra regimen di presidente Nicolas Maduro, cu e meta di obstaculisa e trafico financiero na Merca pa e regimen dictatorial, y via Merca pa e transaccionnan den dollar cu otronan. Cu a bin un excepcion pa e compania Citgo Holding Inc. y su subsidiarionan tabata logico. Problema pa e compania funciona riba mercado Mericano no ta conveni ni gobierno ni e consumidor Mericano. E refinerianan y red di distribucion di combustibel di Citgo ta un parti importante riba e tereno aki. Pero esey ta significa automaticamente cu tur cos ta trankil pa e operacionnan na Aruba, cu realmente mester cuminsa ainda? Riba esey no tin claridad, aunke nos ta comprende di noticia den prensa cu nos ministro di Asuntonan Economico a declara cu e actividadnan na Aruba no ta core peligro…

Nos no ta asina convenci. E punto ta cu e excepcion cu presidente Trump a haci ta concerni e compania Citgo Holding Inc. y su subsidiarionan. Y ken eseynan ta? Pa cuminsa Citgo Petroleum Corporation, cu ta e compania original, doño di e refinerianan y otro propiedad. Tambe PDV America, cu tin parti di propiedadnan cu no ta refineria. Pero e resolucion concerni di gobierno Mericano no ta menciona excepcion pa e otro holding den e cadena entre Citgo Petroleum Corporation y e compania madre na Venezuela, esta PDV Holding Inc. Y kico ta e asunto di e holding lanta specialmente aña pasa como compania propietario di e companianan di nomber Citgo na Aruba, cu yama Citgo Aruba Holding LLC? Esaki ta propiedad di PDV Holding y no di Citgo Holding Inc. Esaki segun nos ta implica cu no tin excepcion pa transaccionnan di tur e subsidiarionan di PDV Holding Inc. Solamente pa su subsidiario Citgo Holding Inc. y na su turno, su subsidiarionan, cu no ta inclui e holding special pa Aruba, cu ta maneha e NVnan na Aruba.

Kico esaki ta bay implica pa e actividadnan na Aruba? Nos no sa, pasobra no ta conoci, por lo menos pa e pueblo aki, di unda te awor e financiamento a bin y di unda e financiamento grandi lo mester bin. Gobierno y Citgo Aruba a anuncia cu nan a haya un bridge loan di US$ 200 miyon, pero manera semper no ta duna claridad di unda e placa aki ta bin. Como cu Venezuela lo ta bay mas den direccion di China y Rusia pa haya financiamento ainda, lo financiamento bin di e banda ey? China lo ta menos problema cu Rusia, cu tambe tin sancion imponi di banda di Merca, cu ta haci cu e companianan subsidiario lo no por tuma placa Ruso pa inverti.

Otro interogante grandi lo ta e proceso den e caso penal contra ministro Paul Croes. E speransa di esunnan cu ta simpatisa cu e ministro ta cu por mira un pronto liberacion den e simannan aki como muestra di cu ‘no tin gran cos’ contra su persona. Esey no ta asina y algun conocedo di e materia ta opina cu e aresto lo bay dura bastante, hasta den e caso cu un dado momento lo tin un confesion, ya cu den e caso aki ta trata di un monton impresionante di papel. Un comparacion cu por haci ta cu e caso di Beta den añanan 90, cu a percura pa un proces-verbaal di e Rosa team di mas di 750 pagina. Probablemente e caso actual ta surpasa e caso ey cu centenares di pagina, sino ta mas. Esaki tambe ta indica cu di tur manera lo no por spera un caso den corte dentro di poco tempo. Cu esey ta positivo o negativo pa e partido den gobierno, o pa nan adversarionan, nos no sa pero ta spera cu di berdad Ministerio Publico haci su trabao sin distincion politico.

Sin embargo, segun cu tempo ta bay pasando y e liberacion tempran no tuma luga, ta bira mas y mas dificil pa mantene e tesis cu no tin nada eybao. No ta OM ta dicidi cu tin prolongacion di e detencion, sino hues comisario. Esey lo aumenta e presion di varios banda pa e partido cuminsa tuma distancia di e ministro. Diripiente por surgi un situacion, den cual e idea original di no laga e ministro bay o dun’e su retiro, pero keda para fuerte, y inventa staatsrecht nobo, ignorando constitucion, ta bay mustra como un mal idea. Pa dia di eleccion, si e ministro ta encarcela ainda, esaki lo a pasa e momento caba cu hues comisario lo a tuma e decision cu e ta keda cera pa basta tempo. Atrobe, dificil pa keda mantene e posicion cu no tin nada ey.