Parada so no ta decisivo

Cu e parada di victoria tras di lomba, nos por concentra riba e recta final di cuatro dia cu nos tin ainda pa yega na e fecha magico. Mas cu den otro eleccion den pasado the stakes are high tin hopi cos den wega. Un victoria pa e partido den gobierno actualmente lo significa cu nan por continua cu e maneho hiba den e dos periodonan anterior. Pero di tur manera nan lo no por continua cu e corupcion actual, lo mester bin medida pa esey. Y nan mes no por haci e limpieza necesario, esey ta mas cu cla, pasobra te awor nan no ta haci nada mas cu nenga cu e ta existi.

Tambe mester atende e incertidumbre cu nos tin den nos futuro economico, y ta importante pa por conta cu un maneho stabiel cu no ta atenta contra e interesnan grandi den nos unico pilar economico. Miho nos cuminsa cu cuida loke nos tin, pasobra lo demas ta puro imaginacion.

Pa cuminsa nos refineria. Nos no ta mira tanto movemento aya y e noticianan internacional tocante e problemanan cu PDVSA y Citgo tin pa sobrevivi ta mustra sombrio. A pesar cu nos ministro encarga cu asunto economico a core bisa cu e medidanan di Merca contra Venezuela no ta afecta e proyecto na Aruba, nos no ta asina convenci. Pa cuminsa te awe no tin un claridad ta ken ta financia, cuanto a pone disponibel caba, y pa ki tempo lo keda cla. Banda di esey e pregunta grandi ta si, pa tempo cu e refineria keda cla pa cuminsa opera, cu ta pa mas tempran fin di otro aña, PDVSA lo no tin crudo ni pa su mes, corda pa exporta pa Aruba. Si acaso tin un cambio di gobierno na Venezuela, loke ta di spera pa nan mes bon, ta probabel cu nan no ta bay reconoce e deal na Aruba. E acuerdo aki no a pasa Asamblea Nacional, y a cera un deal cu ehecutivo, sin cu nan ta autorisa pa haci esaki. Y mester tuma na cuenta cu tin apoyo internacional amplio pa e parlamento legitimamente eligi na fin di 2015. Si na Aruba nan ta kere cu nan por firma cualkier acuerdo cu un regimen criminal anto kere cu e sucesor ta bay reconoce esaki sin mas, nan ta mal ekiboca.

Te na e momento aki ta un minimo di trahado local a logra haya empleo y den e tempo nos dilanti esey no ta bira mucho mas. Mientras tanto, nos ta bayendo pa completa e di tres aña consecutivo di recesion economico y gobierno ta e unico cu no a ripara esaki ainda. Den nan propaganda electoral nan ta gaba cu un crecemento di 3,4% pa 2017, mientras cu tur esaki ta basa riba e hipotesis cu tin miles di persona trahando na parti pariba di e isla. Esey no ta asina, punto. Preocupante? Sigur, pasobra si bin un otro gobierno, nan ta bin topa cu un caha bashi. Nan lo mester cuminsa cu negocia cu Hulanda con pa sali for di e problema financiero, cu di ningun manera ta cuadra cu e deficit minimo di alrededor di 25 miyon florin cu nos lo tabatin, si tur cos a bay normal.

Den su ultimo rapport pa mita di aña CAft tabata preocupa pa entradanan di gobierno cu lo ta kedando atras, esey principalmente pa loke ta loonbelasting y BBO. Pero manera nos ta indica den un articulo acompañante, tin un incertidumbre grandi si ta cobra e suma proyecta pa impuesto riba ganashi, cu ta kedando atras seriamente compara cu aña pasa.

Otro tema cu a capta nos atencion ta e rumornan tocante nombramento na ultimo ora cu lo ta tumando luga den gobierno, riba puestonan importante y sin ningun proceso di solicitud habri. Nos no sa kico exactamente ta berdad di esey, pero nos tin bon noticia pa esunnan na fabor di gobernacion drechi, y mal noticia pa esunnan eventualmente nombra ta existi hurisprudencia unda hues a bati riba dede di tanto gobierno como e individuo en cuestion, argumentando cu ambos tabata atenta contra interes di e pais, y a honra e decision di e gobierno nobo pa no reconoce e nombramento di ultimo ora di e gobierno saliente. Conclusion: maldad ta sucede na cualkier momento, pero den cierto caso e tin su remedi.

E interogante pa e tempo nos dilanti, no ta solamente e resultado di eleccion. A keda colga e asunto di e proceso di investigacion hudicial cu ta tumando luga, y cu ta sigui, independiente di e resultado electoral. Hasta den e caso cu e actual partido den gobierno gana eleccion, esey no ta cambia e perspectiva di mas di un ministro encarcela, incluyendo parti grandi di e grupo rond di nan. Pa reino, e situacion no ta cambia, den e sentido cu nan mester contempla di tur manera e situacion cu ta surgi ora autoridadnan hudicial yega na e fase critico di nan procede, unda por surgi un situacion di instabilidad grandi, cu ta rekeri actuacion contundente pa mantene orden y siguridad publico. Un victoria electoral lo no ta garantia di keda sinta cuatro aña mas.