Despues cu e candela a kima tres lokaal na pasadia Briyo di Solo algun luna atras, nos a compronde for di directora di Stichting Verstandelijk Gehandicapten Aruba (SVGA) Els van Homelen, cu e reconstruccion di e localnan aki por cuminsa januari 2018.
Den augustus un candela a start na Pasadia Briyo di Solo na Piedra Plat. A bin constata cu e candela a cana basta lihe y kima tres localidad. Unidadnan di bombero a logra domina e candela rapidamente, sinembargo e candela a causa basta daño. E causa di e candela no a keda conoci cual aparentemente lo mester a cuminsa un caminda rond di un airco den un di e localnan. Directora di SVGA ta bisa Bon Dia cu siman pasa nan a ricibi placa di seguro pa e reconstruccion di Briyo di Solo. Awor a cuminsa haci palabracionnan cu compania di construccion pa wak ki dia nan por cuminsa.
“Na januari sigur lo cuminsa drecha e lugar,” sra. van Homelen ta bisa. Nan ta contento cu mientrastanto centro di bario Piedra Plat ta laga nan clientenan keda na nan luga pa un temporada mas largo, manera nos a publica algun tempo pasa. Esaki ta positivo pasobra tanten tin e reconstruccion andando e cuido di nan clientenan no ta den peliger, segun nan. Diabierna mainta nan ta bay organisa un caminata cu lo cuminsa 8.30 te 10’or di mainta na Plaza Padu en conexion cu dia internacional pa persona cu limitacion cu ta diadomingo awor. Tur fundacion cu ta traha pa personanan cu limitacion lo ta hunto den e caminata cu nan clientenan. E directora di SVGA a informa nos di e caminata aki algun siman atras y nos lo ta presente pa cubri tur locual lo bay tuma luga. Entre otro entregamento di e tratado internacional di derecho di persona cu limitacion na e prome minister y presidente di parlamento di Aruba.
