Den nos edicion di ayera Bon Dia Aruba a publica informacion di e rapport mas recien di Raad van Advies (RvA) cu ta toca diferente tema, entre otro loke ta organisacion gubernamental y reparticion di cartera di ministernan. Den e rapport aki RvA ta duna tambe un lista di recomendacionnan importante.

E organo consultativo ta indica cu den e agenda di ehecucion di e Landspakket ta bisa cu un revision integral di e companianan (semi) gubernamental y entidadnan gubernamental lo tuma luga riba e punto di legitimidad di participacion publico, efectividad y eficiencia. A base di e revision aki, lo desaroya y implementa propuestanan pa mehora e calidad di efectividad y capacidad di ehecucion di e organisacion di gobierno.

E revision aki lo trece propuestanan pa elimina of agrupa diferente servicionan y/of otro entidad. RvA ta recomenda pa usa e resultado di un revision di e tareanan di gobierno como punto di salida. RvA ta resalta cu pa tareanan cu no ta ser considera mas como tareanan di gobierno, no ta logico cu gobierno mester tuma responsabilidad y lo stop cu e tareanan.

Di e tareanan cu ta ser considera como tareanan di gobierno, mester determina, di nobo, con e tareanan aki por ser ehecuta miho. E pregunta cu RvA ta señala ta surgi ta si e gobierno mester tuma e ehecucion den nan man of si ta preferibel pa laga e ehecucion den man di otro entidad.

E organo consultativo ta remarca cu e consideracion di e posibilidadnan di ehecucion, sea ta publico of priva, mester ta basa riba criterio di bon gobernacion. RvA ta indica cu mester inclui den e discusion aki tambe cuanto influencia di e minister responsabel ta deseabel. E poder ministerial deseabel den e ehecucion di tareanan mester ta proporcional cu e responsabilidad di un minister.

RvA ta recomenda pa prepara un plan di pasonan pa independisacion. Den e rapport di Comision-Sint tin recomendacionnan pa esaki. Nan ta indica cu tambe por usa e marco di politica Hulandes pa fundacionnan. Siguiendo un plan di paso e ta bira cla si ta necesario pa independisacion tuma luga y den ki forma legal esaki mester tuma luga.

E organo ta señala cu manera Economische Bureau Amsterdam (EBA) a indica, ta importante pa gobierno stimula y facilita e iniciativa existente den e sector di instancianan subsidia pa consolidacion, escalacion y profesionalisacion. Esaki lo contraresta e fragmentacion existente den e paisahe di subsidio y contribui na un aumento di legalidad, efectividad y eficiencia di subsidio. RvA ta spera cu for di e revision integral di e compania (semi)gubernamental y entidadnan gubernamental lo sigui recomendacionnan pa esaki tambe.

Raad van Advies ta sigui indica cu entidadnan di gobierno mester por duna informacion basico riba aspectonan financiero y indicadornan di prestacion critico di e proceso primario. Ta importante cu bon gobernacion ta implementa, organisacionnan interno adecuado ta crea y implementa, y cu mester ta proporciona pa mecanismonan di monitoreo interno y externo.

E organo consultativo a pidi atencion anteriormente pa creacion di un marco di politica general pa NV’s di gobierno y entidadnan cu ta eherce un tarea publico, den cual principionan standarisa ta inclui, relaciona cu structuranan interno di checks and balances y e responsabilidad externo cu e meta pa promove integridad, eficiencia, bon orden y calidad di e organisacion.

E Conseho ta considera cu ta deseabel cu un marco di politica uniforma pa ZBO’s ser crea. E marco aki, nan ta splica, por sirbi como un referencia pa e creacion, organisacion y direccion di ZBO’s. E politica mester ta cla y mester ser implementa di un punto dentral; e meta aki ta pa preveni diferencia innecesario entre ZBO’s. Pa preparacion di un regla di e tipo aki, e Kaderwet Hulandes pa ZBO’s por sirbi como guia.

RvA ta indica cu como modelo pa un politica general pa participacion, e Nota Deelnemingenbeleid Rijksoverheid 2013 di Hulanda por sirbi. Den e marco general aki, e Pais como e doño di accionnan den e NV’s di gobierno mester formula un politica cla relaciona cu su posicion como doño di accionnan, saliendo for di e siguiente principionan.

Primeramente, limitacion di su aportacion relaciona cu e operacion di negoshi te na e delineacion di e liña grandi di e politica cu mester sigui pa medio di un plan strategico of plan di politica. Di dos, miembronan di e directiva y e organonan di monitoreo mester cumpli cu criterio pre-formula relaciona cu conocemento y experencia pa garantisa calidad. Di tres, e organonan di monitoreo mester evalua regularmente e politica di strategia y plan di politica y informa e doño di e accionnan. Y pot ultimo, e organonan di monitoreo mester garantisa continuidad, eficiencia y efectividad di e operacion di negoshi cu atencion pa e interes di tur stakeholder.

E organo ta menciona cu por pensa riba e Landsverordening Corporate Governance, caminda e kadernan general pa bon gobernacion ta ser presenta. E terminacion adicional por tuma luga a base di un landsbesluit siguiendo e guianan di e OECD.

RvA ta agrega cu EBA a indica cu un sistema di subsidio exitoso no ta consisti solamente di regla y proceduranan imponi pa e gobierno. E instancianan cu ta ricibi subsidio tin tambe un responsabilidad propio riba bon uso di fondo publico, transparencia, responsabilidad y bon gobernacion. P’esey, nan ta resalta, ta importante pa introduci mas regla y norma den e area di bon gobernacion.

E organo ta splica cu entre e doño di accionnan y e directiva di e entidadnan di gobierno mester tin un acuerdo cla riba e ratio financiero y economico caminda cada entidad por opera. Pa e NV’s di gobierno cu no a haci esaki ainda, nan mester formula un politica di dividendo y reservacion specifico.

Raad van Advies ta remarca cu mester sigura cu tur aña un rapport di e participacionnan ta ser manda pa e Parlamento di Aruba, siguiendo e ehempel di Hulanda su Jaarverslag Beheer Staatsdeelnemingen.

RvA ta resalta cu e introduccion di diferente tarifanan destina pa financia e tareanan di gobierno cu a ser independisa ta complica e sistema di impuesto di Aruba. Esaki ta contrario cu e intencion di e Landspakket pa haci e sistema di impuesto di Aruba mas fuerte y simpel.

Por ultimo e organo consultativo ta recomenda cu mester considera colaboracion cu un of mas paisnan den e Reino. RvA ta sugeri pa considera si den cierto area por tin colaboracion cu un of mas pais den e Reino a base di un regulacion mutuo den articulo 38 di e Statuut. Como ehempel nan ta nombra e departamentonan meteorologico di e paisnan Caribense y e National System for Statistics.