Recientemente, den un anterior Editorial, nos a adverti pa un apertura demasiado pura y no bon fundamenta di nos frontera cu Venezuela. No por desmenti na e momento aki cu nos ta hayando un aumento rapido di persona for di e pais ey cu ta busca un forma di drenta na nos pais. E aspecto mas tristo di esey ta cu, mas hende cu ta purba yega na nos costa, mas nos ta haya nos confronta cu esnan cu no ta logra, pa via di accidente cu e embarcacionnan emplea den e aventuranan aki. Esey no tin di haci primeramente cu nos maneho nacional pa brinda acceso of no na persona di e nacion ey, pero sigur cu e maneho cu gobierno Venezolano ta hibando. Kico na e banda ey ta e diferencia? Cu e control estricto riba salida di hende a bira mas suave, aunke e ta existi ainda. E corupcion di permiti hende sali clandestinamente t’ey keto bay. Ora bo ta sali cu boto di Venezuela, no ta e capitan so bo mester paga… En todo caso, tin un interes di gobierno pa mas tanto hende por sali di e pais, hustamente pasobra nan ta ocasiona mas problema y confusion pa nos.
Nos por observa tambe otro parti di e maneho gubernamental, por ehemplo cu den medio di comunicacion aya ta referi cu cierto placer cu turismo di Venezuela pa Corsou a aumenta cu mas di 300% ultimamente. E apertura cu gobierno di Venezuela, a traves di comerciantenan supuestamente ‘no liga’ na e regimen, ta ser mira di nos banda como algo ‘comercial’, neglishando loke ta e intencion di banda Venezolano. Y ademas neglishando e otro interesnan cu nos tin como pais, y e necesidad di actua como un solo bloque como Reino, cu al fin y al cabo ta esun cu tin frontera cu e pais bisiña.
Nos por a tuma nota tambe di e declaracion di promer ministro di Corsou, ken ta tuma un otro posicion den e conflicto entre Guyana y Venezuela cu representacion oficial di Reino Hulandes. Den esaki e mandatario aki ta pretende di ta tin un posicion “mas neutral” cu gobierno Hulandes cu ta responsable pa relacion internacional y cu ta mantene relacion diplomatico cu e paisnan den conflicto. Acaso nos ta kere cu e tipo di expresion aki tin como base solamente e opinion personal di un mandatario talvez ‘mal informa’, o cu ta defende solamente interes economico di su isla? Acaso nos ta kere cu henter e acercamento comercial reciente a nace den seno di comerciante no liga politicamente, cu por a biaha libremente pa ‘haci nan cos’, sin envolvimento di e regimen dictatorial cu casi ta duna permiso pa solo sali tur mainta, na modo di papia? Pa esnan entre nos cu ta sigui e sucesonan den nos region cu regularidad, ta logico cu e regimen ta haciendo esfuerzo pa crea un pantaya di ‘normalidad’ di e pais, tanto pa consumo interno como como pa proyeccion internacional, no na ultimo lugar cu eleccion presidencial na vista otro aña.
Elemento den e strategia gubernamental Venezolano aki ta e acercamento cu Merca, a traves di cierto interes comun den petroleo. E unico empresa petrolero Mericano grandi cu ta opera na Venezuela, Chevron, por a reanuda exportacion di crudo pa Merca, bao di condicion estricto. Algun luna den e situacion aki, unda Venezuela tambe ta probecha via mayor ingreso di impuesto y ‘royalties’, ya ta obvio cu e dictadura no tin ningun intencion di libera preso politico, libera ciudadano Mericano preso, y tene eleccion presidencial liber. Proximamente gobierno Mericano por revoca e permiso di Chevron y e situacion lo bira hopi tenso atrobe, sigur pa oposicion na e pais bisiña. Dictadura di Maduro lo purba tur cos pa impedi participacion real di oposicion na eleccion berdaderamente liber. Y nos ta kere cu e hecho cu presidente Maduro por declara cu gobierno Hulandes ta contradeci su mes, pasobra su propio teritorionan na costa di Venezuela si ta pro un actitud mas amigable pa cu su regimen, cu esey ta yuda den e posicion firme cu mester mantene cu e dictadura aki?
Na e momento aki ta di primordial importancia cu nos gobierno ta actua cu nos interesnan na promer lugar. Y esey ta: evita di tur manera cu nos ta haya nos cu un aumento drastico di refugiado, berdadero y falso, cu ta bin añadi na nos problemanan, entre otro di vivienda. Y ya cu nos ta papiando di maneho den e asunto aki, un pregunta dirigi na nos politiconan: Nos ta acepta un maneho ‘de facto’ di amnistia general pa e personanan di nacionalidad Venezolano, cu den hopi caso tin varios aña ta biba y traha na nos isla, a traves di e maneho cu e actual mandatario a pronuncia di kier hiba, di absolucion di nan permanencia ilegal na nos isla? Esaki via otorgamento di permiso di permanencia relaciona cu trabao, a base di e escasez considerable di trahador cu tin actualmente. Esaki no ta un asunto di simplemente bisa si of no awor, na e ‘legalizacion’ actual cu lo tuma lugar. Ta trata di un tema cu tin hopi consecuencia a largo plazo, incluyendo e opcion despues di permanencia suficiente, di nacionalidad Hulandes. Por lo tanto, un tema cu ta concerni gobierno di Hulanda, y di Reino, tambe. Nos ta ripara cu practicamente no tin animo, ni banda gubernamental, ni di banda opositor, pa exigi atencion pa e asunto aki. Asina nos ta parce di berdad isleño cu no por wak mas leu cu nan propio costa.
