Hunto cu e pandemia di coronavirus/Covid-19 a lanta otro pandemia, esta pandemia di fake news of informacion falso. Segun un encuesta di Canadian Journalism Foundation, 83% di e personanan encuesta tabata specialmente preocupa pa motibo di e fake news cu lo por compromete nan salud pa medio di divulgacion of publicacion di informacion eroneo.

E pandemia di Covid-19 a trece cune loke Organisacion Mundial di Salud (WHO) a cualifica como ‘infodemia’ masivo. E ta un explosion potencialmente mortal di informacion falso (fake news) of mal informacion na nivel global, y Aruba no ta un excepcion.

Lucha contra fake news.
Den e crisis cu mundo henter y nos pais ta pasando aden, Gobierno di Aruba a alerta nos comunidad riba e fenomeno di fake news. Tanto asina cu den nan website oficial pa divulga informacion relaciona cu e desaroyo di e virus aki (www.arubacovid19.org), nan a bin cu un seccion dedica exclusivamente pa desmenti oficialmente como falso e fake news, entre nan: scarsedad di cuminda, WhatsApp screenshot ‘3 dokter infecta’, y voice note tocante caso positivo.

Ayera tambe a wordo divulga un update di 92 caso positivo totalmente falso. Nan a uza e logonan di Gobierno di Aruba y DVG pa mustr’e como uno oficial. P’esey tanto gobierno como DVG a conseha comunidad pa check prome riba nan website oficial ora cu e tipo di informacion aki ta wordo divulga. Si e no ta aparece ta pasobra e no ta confiabel, asina PR di DVG, Jurette Croes a yega di informa.

Lamentablemente personanan di henter mundo a muri debi na e consumo di mal informacion of fake news, relaciona cu tratamento di Covid-19 falso of no aproba. E fuente di fake news aki ta comparti nan informacion falso via memes viral y cadena di mensahe.

Periodismo responsabel y di calidad ta hibando un lucha contra mal informacion y fake news pa evita cu opinion publico por perde nan credibilidad riba e medionan cu ta produci y divulga noticia, ya sea corant, radio, periodista specialisa/freelance, social media y medionan digital. Pues si e mesun medionan di informacion no ta implementa medidanan di control di e fuente di informacion, esaki por trece cune cu e publico ta disminui su confiansa riba tur informacion, meymey di un pandemia di e Covid-19. Ya cu ta resulta cada biaha mas dificil pa nan por distingui entre e echo berdadero y esun falso, kiermen informacion legitimo y fraude.

Nos tur por bira victima di agentenan di fake news, y cada un di nos tin un rol pa cumpli den e lucha aki. Di un banda, e editornan y periodistanan sea consciente di e strategia cu e agentenan di fake news ta uza pa divulga mal informacion, entre nan fuente fraudulento, cuenta falso den rednan social, datonan contamina y publicacionnan no autentico.

Fuente di informacion.
Un punto cu publico mester tene cuenta ta si e articulo ta cita fuentenan confiabel y specialisa. P’esey ta importante pa e publico sa cual ta e fuente cu ta duna sosten na e informacion divulga.

Relaciona cu e caso specifico di e Covid-19 ta recomendabel pa cada periodista na momento di traha su informacion por sigui e informacion duna door di autoridadnan di salubridad publico. Pero tambe informacion oficial di WHO y Organisacion Panamericana di Salud (PAHO). Si eventualmente e hecho- of datonan divulga no ta confiabel, ta importante pa logra contacto ya sea cu un oficina di PAHO, pero tambe cu WHO.

Na Aruba e informacion rond di e coronavirus, gobierno a centralis’e pa medio di DVG. Dos biaha pa dia nan ta bin cu un update transmiti via e canal oficial di TeleAruba y Facebook-page: Gabinete Wever-Croes, y otro medionan di informacion. Tambe dunado di cuido, fundacionnan y diferente instancia ta wordo invita pa duna informacion di conscientisacion y educativo.

P’esey ta importante pa prensa tene cuenta cu e asociacion di dokter di cas, academia y/of facultad di medicina, asociacion di specialistanan, etc… E fuentenan aki por tin data, y si nan no tin data, nan por bira un canal pa prensa por tin acceso na cierto data, y asina por cumpli cu e derecho di informa debidamente nos comunidad.

Red Internacional di Periodistanan (ijnet) a bin cu un serie di articulo specialisa rond di e topico di coronavirus. Nan a yega di publica recomendacion clave cu por yuda e profesionalnan di e medionan masivo di comunicacion pa contraresta e fenomeno di fake news y defende e practica di periodismo di calidad. Asina como prensa nos por salvaguardia e derecho cu comunidad tin pa wordo informa obhetivamente, un derecho basa den e derechonan humano.