Tin hopi problema social relaciona cu e situacion di nos hoben den problema cu husticia cu mester pone hopi atencion na dje. Ya cu “e hobennan aki ta e futuro y nan ta e producto di e problemanan social cu tin na Aruba.”
Esaki directora di Reclassering, Seraida Pemberton ta expresa na Bon Dia Aruba. E ta haya cu si no ta pone atencion na e asunto aki nos ta keda bay den decadencia pa locual ta nos hobennan.
Sra. Pemberton ta bisa tambe cu hobennan na Aruba por lo general nan ta haciendo bon, ya cu “nos tin hobennan basta positivo.” Actualmente un 15 pa 20% di nos poblacion hubenil no ta causando problema. Por ta debi cu e porcentahe aki ta mustra hopi abou, no a wordo poni debido atencion na e grupo ey. “Nos ta bisa e caliber di e hobennan ta cambiando y mester pone mas atencion na nan.”
Asina e ta mira e bentaha y beneficio di un proyecto di supervision electrotecnico uno faborabel pa nos hobennan y nos comunidad. E ta bisa cu tin un promedio entre 80 pa 90 hoben cu ta cay bou e fundacion aki pa motibo cu nan a comete un delito. Un 60% di nan ta recidivistanan cu a cay cera y nan ta bolbe ripiti. Esun cu a cay pa prome biaha hopi biaha pa medio di guia individual of den grupo nan ta logra stabilisa nan. Pero e grupo cu constantemente ta cay bek, ta esun mas dificil.
Proyecto piloto
P’esey supervision electronico ta un proyecto cu fundacion Reclassering lo kier bira realidad cu e contribucion di henter comunidad pa medio di nan campaña of fundraising “double up 55.” E lo ta inicialmente un proyecto piloto chikito di 6 luna pa wak si algo asina lo traha aki na Aruba. E meta ta pa pone restriccion den movecionnan di e hoben (controla unda nan ta bay pa medio di un banchi electronico), y asina yuda e hoben den su ambiente familiar mes. Esaki por tackle e problema di gang pero tambe baha e consecuencianan negativo di un detencion den KIA.
Pa añanan largo Reclassering ta bin sclama nan preocupacion di falta di fondo pa realisa debidamente nan trabou y ehecuta nan proyectonan. Sra. Pemberton ta kere cu prioridadnan mester bini y stipula; y nos hobennan mester keda un prioridad considerando cu nan ta nos futuro. E situacion ta cu nos tin un problema social basta grandi cu mester di atencion, ya cu e hobennan ta keda e producto di e situacion aki.
“Durante añanan nos a keda señala cu reclassering ta purba tackle e problema, pasobra nos ta haya e hobennan ora cu a comete e delito caba. E ora, nos trabou ta pa evita cu nan bolbe cay cera.” E ta agrega cu pa realisa e trabou ey nan mester di personal y medionan financiero
Cu e 100 mil florin cu nan a pone como meta di nan campaña “double up 55” den cuadro di nan 55 aña di existencia, Reclassering lo cumpra e banchi electronico, ya cu un problema cu nan tin ta e movecion di e hobennan cu nan no por controla na unda nan ta. “Cu e banchi bo por tin un restriccion den nan movecionnan y bo ta duna nan guia na nan mesun medio ambiente locual ta yuda nan tambe.” Tambe e ta yuda minimalisa e efecto negativo cu un detencion den KIA por tin cerca un hoben.
