Diaranson mainta fundacion pa Rehabilitacion y Proteccion Hubenil miho conoci como Reclassering a tene un mainta di informacion tocante “Criminalidad Hubenil”. E mainta di informacion aki cu a tuma luga den Sunset Garden Ballroom di Divi Phoenix Aruba a conta cu asistencia di diferente partner di nos comunidad.
Sra. Sandra Brown kende ta forma parti di e directiva di Reclassering a splica e diferente trabou cu e fundacion aki ta atende cun’e pa brinda un segundo oportunidad pa e hobennan cu a cay den problema cu husticia.
E ta un fundacion cu Sra. Brown tin un “amor special”, ya cu su 21 aña di edad el a core stage den Reclassering. Sinembargo e ta reconoce cu e problematica di nos hobennan a bira mas compleho compara cu varios aña pasa. El a trece como ehempel e fenomeno di “joy riding”, caminda antes e hobennan tabata bay cu bo auto pa haci acto di baldadi y laga e vehiculo bandona un caminda. Pero awor nan ta horta bo auto y desmantela bo vehiculo pa bende e piezanan den un forma di crimen organisa.
Envolvimento di Reclassering
Di su banda, directora di Reclassering, Sra. Seraida Pemberton a papia ampliamente riba historia, organisacion, meta, proyectonan y logronan di e fundacion aki. El a laga sa cu nan tin como obhetivo trece bek den comunidad e hobennan cu a cay den man di husticia. El a laga sa cu Reclassering tin un convenio cu polis cu na momento cu un menor di edad ta cay cera, nos autoridad policial ta tuma contacto cu nan. El a trece dilanti cu edad di nos hobennan envolvi den criminalidad ta bahando, y esun mas hoben registra e aña aki tabatin 11 aña di edad so.
Ta asina cu nan ta envolvi den henter e proceso di un hoben cu a cay den delincuencia. Ora cu un hoben ta cay cera nan ta bishita e detenido y nan ta haci un screenmento y traha un rapport pa Ministerio Publico, caminda Reclassering ta trece e posibel causanan cu a conduci e hoben cay den criminalidad y kico nan por haci pa stabilisa socialmente e hoben.
Sra. Pemberton tabata masha cla pa bisa cu: “Nos no ta haci e parti di polis, nos ta investiga e persona”. E kiermen cu polis ta atende cu e caso criminal mes, tanten Reclassering ta investiga e ambiente social y familiar cu por a conduci cu e hoben a comete un delito. Asina fiscal y hues lo por tin un evaluacion amplio riba kende ta e persona, y no solamente e delito.
Kibra stigma
Durante su presentacion, vice presidente di Reclassering sr. Erick Bennet a laga sa cu e fundacion aki a mustra su resultado y efectividad, danki na e diferente proyecto cu nan ta bin realisando pa rescata e hobennan fei e garanan di criminalidad, locual ta re afirma cu Reclassering tin su derecho di existencia.
El a bisa cu e mainta informativo aki tabatin como meta entre otro di haci e empresanan consciente di e trabou cu Reclassering ta haciendo. Mas tanto riba e proyectonan cu nan tin mester sigui desaroya y mantene nan, ya cu den e añanan venidero nan tin mester cu e comunidad ta mas consciente y tambe yuda y traha hunto cu e fundacion.
“Nos kier haci e comunidad mas consciente y informa nan kico ta Reclassering y kico ta e trabou cu nos ta haciendo y kende ta nos clientenan y con nan por contribui den e trabou cu nos ta haciendo…”, el a bisa. Nan tin mester di mentornan y coachnan ya cu nan por forma parti di nan trabou.
Ademas nan kier sa con empresanan lo por contribui di un forma structural na e diferente proyectonan cu nan tin. Un manera ta bou e forma di adopcion di Reclassering, caminda e partnernan social ya sea empresanan, lo por contribui cada luna cu un cierto suma of nan ta adopta un proyecto, ya cu e fundacion aki mester di fondo. Tambe pa e comunidad sa cu “Reclassering ta algo di nos tur”, el a bisa.
Un aspecto cu e ta considera importante ta esun di “kibra e stigma” cu ta existi den comunidad riba e hobennan cu a wordo yuda pa via di Reclassering y cu nan mester di un oportunidad mas. E ta considera importante pa kibra e stigma aki y Reclassering ta bay haci loke nan por pa kibra esey. E ta haya cu hopi biaha e tin di haber cu falta di conocemento. Nan tin pensa di bin cu mas presentacion pa promove e trabou cu e fundacion aki ta realisando specialmente pa nos hobennan cu pa un of otro motibo a desvia fei e caminda drechi.
