E hobennan cu ta cay den man di polis pa acto criminal no ta stop. Mas bien e ta mustra cu lamentablemente e ta creciendo keto bay. Recientemente un hoben a entrega su mes como principal sospechoso di un caso di asesinato pafo di un club nocturno. Mientras cu a bira un rutina di fin di siman cu polis durante nan control ta detene hendenan jong sospecha di actonan di delincuencia.

Directora di Reclassering, Seraida Pemberton ta declara na Bon Dia Aruba, cu criminalidad hubenil ta ‘un sintoma di e problemanan social’. E ta haya cu mester pone atencion riba e parti socioeconomico di e pais. Ta importante pa bin cu un investigacion pa wak con por deal cu e aspecto socioeconomico pa baha e criminalidad cerca di nos poblacion hoben y esunnan mas vulnerabel.

Mester di mas  recurso disponibel
E ta haya cu  unabes cu un hoben ta comete un delito mester tin diferente cos disponibel pa baha e nivel di recidivista. Eynan e ta kere cu nos pais mester traha mas duro pa pone tur cos na alcance pa logra e meta. El a pone como ehempel e situacion di Reclassering, ya cu nan ta un instancia cu ta duna guia, pero actualmente nan ta corto di personal. Nan no tin e medio financiero ni e personal pa duna un guia intensivo pa e hobennan.

Tampoco nos pais no tin un institucion pa e hobennan cu no por haya guia ambulante. Esey ta un aspecto cu mester traha algo riba dje. Aunke gobierno a yega di traha riba e parti ey, pero ainda nos no tin bista ki dia e  Centro Ortopedagogico ta bay habri. Tampoco no ta conoci si e centro aki por trata tur e cantidad di hoben problematico cu tin actualmente.

Tambe tin e caso di e hobennan hopi problematico cu a bay cera pa delitonan mas pisa. Den e caso aki mester reorganisa KIA pa asina e seccion of paviljoen destina pa e hobennan aki mester ta ekipa pa atende cu nan. Aruba tin institucion destina pa atende cu e hobennan cu a cay den criminalidad, manera Reclassering, Centro Ortopedagogico, KIA. Pero si nan no tin e instrumentonan of recursonan financiero necesario pa traha, ‘bo ta keda cu e grupo ta bay keda bin bek’, sra. Pemberton ta bisa. Pues mester reconoce cu nos tin cierto cos disponibel; pero nan no ta completamente cla; y mester duna tempo pa ehecuta nan debidamente.

Resocialisacion y compromiso comunitario
E trabou cu nan ta haci como fundacion pa resocialisa tanto hende jong como adulto, no ta uno cu e fundacion aki por haci su so. “Mester traha hunto pa e parti di resocialisacion.” Hunto e kiermen instancianan cu ta duna cierto servicio, companianan, gobierno, etc. ya cu e no ta un problema di un hende of instancia so; sino cu nos tur mester traha hunto pa combati e problema aki.

E ta bisa cu sin duda Reclassering tin un rol  importante den e cadena di husticia, ya cu  mundialmente ta conoci cu programanan pa modifica comportacion ta yuda hopi mas pa baha e recidivistanan cu un detencion riba su mes.

“E trabou di Reclassering ta poni den ley”, e directora ta splica. Pues si un persona ta haya un castigo condicional, den ley ta poni cu e tin cu haya guia di un organisacion manera Reclassering.  P’esey,  sra. Pemberton ta sigura cu Reclassering tin derecho di existencia, ya cu den ley ta poni e rol di Reclassering den tur area.  Esaki no ta descarta cu si un hoben cu ta comete un crimen grave no ta haya un castigo. Pero esaki no ta kita cu mester brinda nan  tipo di programanan  pa nan rehabilita tanto di prizon como pafo,  ya cu un dia nan lo sali for di prizon pa forma parti bek di nos comunidad.

Antes mundialente no tabata tene cuenta cu e parti di resocialisacion; ya cu e pensamento di antes tabata cu un castigo di prizon ta suficiente. Pero durante aña bo ta ripara cu esey no ta suficiente; y e no ta duna e resultado desea. Mientras cu e parti di resocialisacion si a cuminsa mustra su resultado positivo. P’esey e ta considera cu nos pais mester pone atencion na e parti di resocialisacion, pasobra e ta yuda e persona cambia nan mentalidad y nan comportacion.

Circulo vicioso
Sra. Pemberton ta excepcion ainda ya cu nos comunidad mester siña hopi ainda riba e area di resocialisacion, specialmente den nos mercado laboral. Hopi hende cu a cay cera ora cu nan ta sali  for di prizon ta hopi dificil pa nan haya trabou. Reclassering ta acercando companianan pa hunto cu nan duna guia  pa e hendenan cu nan tuma den servicio. “Pero Aruba tin cu crece hopi mas riba e area ey pa duna e hendenan aki chens, sino e ta keda cay den un circulo vicioso.”

Na final e ta laga sa cu e nucleo aki ta e parti debil di comunidad. Si nos ta keda sigui ignor’e keriendo cu e solucion ta prizon so, e ta bay keda un problema cu lo sigui crece keto bay. Si nos no ta pone pronto atencion na dje, nos no ta bay niun caminda. Criminalidad ta haci mas daño cu bon na nos economia, ya cu criminalidad ta afecta tur area di nos comunidad, entre e parti di turismo, social, familiar, etc., asina e ta conclui.