Presidente di Stichting Reclassering Jeugdbescherming Aruba, Sandra Brown a anuncia cu e fundacion aki cu ta traha pa rehabilita y protege e hobennan cu a cay cera of cu a confronta problema cu husticia, a cuminsa celebra Siman Reclassering den cuadro di nan 55 aniversario di existencia.
Tanto Sra. Brown como Sra. Seraida Pemberton kende ta directora di e fundacion aki a anuncia e introduccion oficial di nan website nobo: www.reclasseringaruba.com. “Nos ta existi 55 aña pero e conocemento di nos fundacion ta hopi abou”, asina Sra. Pemberton ta bisa.
E ta un website cu tur hende interesa por subi y haya mas informacion tocante e trabou cu Reclassering ta bin realisando pa mas cu cinco decada den nos comunidad. Tambe e diferente departamento cu ta traha cu nan. Di e forma aki nos pueblo di un forma regular ta wordo informa di nan proyectonan y di nan resultadonan.
Igualmente e mayornan lo haya un pagina relaciona cu e preguntanan cu mayornan of esunnan cu ta haya nan mes cu problema cu husticia ta formula habitualmente na e fundacion aki. Entre otro cu nan por haya un abogado liber y con pa haya un reclassering rapport .
Tambe nan lo bin cu nan Facebookpage (Stichting Reclassering Aruba) pa sigui tur e desaroyo, proyectonan y programa cu fundacion Reclassering ta atendiendo cu nan.
Campaña “double up 55”
Sra. Brown a probecha e oportunidad aki pa pone enfoke riba nan campaña “double up 55” cu nan a bin cu ne den nan “Reclasseringsweek”. Nan ta haci un peticion na pueblo pa yuda e fundacion pa recauda fondo, no solamente durante e siman aki pero durante e temporada venidero te december 2016. “E intencion ta pa nos recauda 100 mil florin pa yuda cu e proyectonan cu nos ta bin andando.”
Un di e proyectonan tin di haber cu un programa den grupo ambulante di tres luna pa hobennan cu ta uza droga. Un 80 pa 90% di hobennan cu ta haya nan mes den problema cu husticia ta uza of ta adicto ta marihuana. Den e programa den grupo lo enfoca pa duna e hobennan otro tools pa por trankilisa sin marihuana y tambe haci nan consciente di e consecuencia a termino largo.
E otro proyecto tin di haber cu supervision electronico uzando un banchi. Esaki lo ta un proyecto piloto chikito di 6 luna pa wak si algo asina lo por traha aki na Aruba. E meta ta pa pone restriccion den movecionnan di e hoben (controla unda nan ta bay), y yuda e hoben den su ambiente familiar mes. Esaki por tackle e problema di gang pero tambe baha e consecuencianan negativo di un detencion den KIA.
