Recien encuesta di BCA ta confirma impacto grandi di e pandemia riba e bienestar financiero di hogarnan

Mas cu 30 porciento ta indica cu nan tin demasiado debe,
mientras cu 1 den cada 3 hogar tin dificultad pa paga pa cuminda

Esaki ta un di e resultadonan principal di un investigacion cu Banco Central di Aruba (BCA) a conclui recientemente. Na luna di april y mei ultimo, BCA a organisa pa di tres biaha den ultimo dies aña un encuesta nacional pa haya un bista riba e bienestar financiero di hogarnan na Aruba. En total, casi 1300 famia for di tur districto a participa di forma digital den e encuesta. Awe a publica e resultadonan riba website di BCA.

E meta di e encuesta no tabata pa solamente midi e posicion financiero di hogar basa riba nan entreda y gastonan, sino tambe e impacto di e COVID-19 pandemia riba e percepcion y sentimento di bienestar financiero di famia. E resultadonan ta confirma cu mas cu 60 porciento di famianan den nos comunidad a keda afecta door di perdida di entrada. Casi 50 porciento di hogarnan ta indica di ta gana menos cu Afl. 4000 pa luna, mientras cu e promedio di entrada pa hogar ta un Afl. 4200 pa luna, un caida grandi compara cu dos aña pasa. Esaki a afecta no solamente e poder di compra di hogar sino tambe e bienestar general di famia.

E efecto di e pandemia riba mercado laboral a causa cu e diferencia den entrada entre hogarnan a bira mas grandi y cu e nivel di pobresa relativo a crece. E resultadonan ta mustra cu un 20 porciento di hogarnan ta gana menos cu mitad di e promedio di entrada nacional. Mas cu 30 porciento di hogarnan na Aruba ta raporta cu nan tin demasiado debe y tin problema pa cubri nan gastonan mensual. Ta e famianan cu ta gana relativamente mas y cu tin un trabou fiho ta bisa cu nan ta mas satisfecho cu nan situacion financiero. Sin embargo, solamente un 20 porciento di hogarnan ta indica cu esaki ta e caso.

Pa casi 1 den cada 3 hogar na Aruba (29 porciento) e tabata dificil pa nan famia cumpra cuminda den ultimo 6 luna. Mayoria di hogarnan vulnerabel a indica di a ricibi ayudo financiero y no-financiero di diferente instancia. Ademas di depende riba asistencia financiero y subsidio di salario di gobierno, diferente hogar ta steun tambe riba fiansanan di famia y/of dunado di trabou. Casi 20 porciento ta informa cu nan tin un entrada extra di un side-job of trabou extra.

Di otro banda, e resultadonan di e investigacion tambe ta mustra con hogarnan na Aruba a adapta y ta sigui adapta na e ‘normal nobo’ door di gasta menos placa y planea nan gastonan necesario di un miho forma. Ta asina aki cu 1 den cada 4 hogar na Aruba ta purba spaar riba awa y coriente, ademas di re-usa of recicla producto na cas. Un 16 porciento di hogarnan cu a participa den e encuesta ta bisa cu nan ta planta na cas. Por conclui cu e pandemia tambe a causa cu cierto hogar a adapta nan comportacion financiero pa asina mehora nan posicion y bienestar financiero.

E resultadonan di e encuesta ta mustra cu pa por fortalese e bienestar financiero di hogarnan den nos comunidad lo rekeri esfuerso continuo di instancianan gubernamental y financiero, ademas di organisacionan social. Aunke asistencia financiero ta esencial pa varios famia na Aruba, ta importante pa sigui educa famianan con pa maneha nan finansa y purba di spaar aunke con dificil. Cu otro palabra, asistencia financiero y educacion financiero mester bay man den man. Manera e dicho ta bisa: duna un hende pisca y e tin cuminda e dia ey; siña un hende pisca (of planta) y e tin cuminda pa hopi mas tempo.

Di e mesun forma tambe mester registra y proteha e famianan mas vulnerable den nos comunidad pa evita cu nan situacion ta empeora. Asina aki por pensa riba un instancia special unda cu por registra debe y credito, un asina yama ‘Bureau Kredietregistratie’. Di e manera aki lo por tin un bista mas amplio y prudente di e nivel di credito y e presion di debe riba situacion financiero di famianan. Introduccion di un ombudsman financiero tambe lo ta un recomendacion pa considera. Pa por proteha consumidor, ta urgente pa introduci di un ley pa regula nivel di credito y pago di interes exorbitante cu por crea problema serio.

Ambos sugerencia a wordo haci door di BCA den pasado. Ya tin un concepto di ley riba supervision di credito na consumidor cu tin varios aña pendiente pa aprobacion na Parlamento di Aruba. Como ultimo ta importante pa señala y enfatisa e importancia di educacion financiero continuo dirigi na diferente grupo den nos comunidad. Awe den e ‘normal nobo’ cu nos ta experiencia resultando di cambionan rapido den e desaroyo economico, e hermentnan y capacidadnan aki a bira ainda mas importante.

BCA ta a gradici tur famia y hogar cu a participa den e encuesta aki. Nos ta aprecia e tempo y contestanan cu a wordo comparti. E informe completo ta disponibel riba website di BCA (www.cbaruba.org).