Nemesis Trapenberg a gradua pa un bachelor den Trabou Social y Desaroyo na Universidad di Aruba. Pa su tesis el a investiga recidivismo na Aruba, pues personanan cu ta cay bek den criminalidad.
For di 31 januari 2013, 93.75% di e populacion den prison tabata hende homber cu un cifra di recidivismo di 36%. E investigacion a conclui cu e caracteristicanan di e e hende homber cu ta recidivi ta entre e grupo di edad di 19-40 aña, soltero, nan tin por lo menos dos pa cinco yiu, Catolico Romano y e crimen mas comun cometi ta ladronicia.
Trapenberg ta conclui cu incarceracion ta un intervencion costoso, pero no tur ora ta preveni futuro crimen of preveni recidivismo. Pa reduci esaki e prisonero mester tin acceso na por lo menos ocho servicio, e graduado ta indica Esakinan ta inclui educacion, servicio pa salud mental, reintegracion den tereno laboral, vivienda, reintegracion den comunidad, sosten financiero y servicio pa addiccion y guia spiritual.
For di e 30 hende homber den prison cu a participa na e estudio, ocho a ricibi guia spiritual, seis a haya un of otro programa educacional y uno a beneficia di un tratamento contra abuso di substancia. E investigacion ta conclui cu e participantenan na e investigacion no a beneficia di e ocho servicionan necesario y cu esaki por ta algun di e motibonan cu nan ta pega den e, asina yama, “revolving door”.
Programa di cuido
Trapenberg a haci cierto recomendacion, algun di cual ta inclui, un programa di cuido pa cada un di e prisoneronan despues cu nan sali for di prison, un estudio longitudinal di e 30 hende hombernan cu a participa ta e estudio aki y cu KIA fortifica su colaboracion cu tur e facilidadnan na Universidad di Aruba y asina usa tur e competencianan di e professional hoben, vibrante y creative den e area di trabou social, lei, finansas, economia, hospitalidad y gobernamento.
