Reino Uni ayera a dicidi di permiti gigante di tecnologia Chines, Huawei pa tin un rol limita den provee e ekipo di red di velocidad halto na proveedor di wireless, ignorando advertencia di gobierno Mericano cu esaki por corta lasonan di intercambio di inteligencia.
Decision di Reino Uni ta e prome di un aliado mayor di Merca na Europa, y ta yega despues di lobbying intenso di administracion di Trump, mientras Merca ta competi cu China pa dominio tecnologico.
Esaki ta pone un enfrentamento diplomatico cu e Mericanonan, ken ta bisa cu soberania Britanico ta den riesgo pasobra e compania por duna gobierno Chines acceso na data, un acusacion cu Huawei ta rechasa.
“Nunca nos lo tuma decision cu ta menasa nos siguridad nacional of siguridad di nos partner di Five Eyes”, secretario di exterior, Dominic Raab a bisa, referiendo na un acuerdo di siguridad den cual Reino Uni, Merca, Australia, Canada y New Zealand ta comparti inteligencia. “Nos sa mas di Huawei y e riesgonan cu ta representa cu cualkier otro pais den mundo.”
E decision tabata incomodo pa Prome Minister Britanico, Boris Johnson, kende ta ariesga e furia di un di e aliadonan mas cercano di Reino Uni net na un momento den cual tin mester di administracion di Trump pa logra un acuerdo comercial lihe despues di Brexit. Oficialmente, Reino Uni ta bandona Union Europeo den fin di siman, y Secretario di Estado Mericano, Mike Pompeo ta programa pa un bishita di dos dia cuminsando awe pa reuni cu Johnson y Raab pa reafirma e relacion trans-Atlantico.
Den su decision, gobierno Britanico a bisa cu tabata excluyendo companianan di ‘riesgo halto’ di suministra e partinan ‘central’ sensitivo di e rednan 5G. E parti central ta e cerebro cu ta track, entre otro, smartphone conectando na rednan y ta yuda maneha trafico di data.
Pero Reino Uni lo permiti proveedonan di riesgo halto pa suministra te cu 35% di e red di radio menos riesgoso di un compania, basa riba factornan incluyendo e cantidad di trafico di data y e cantidad di stacion base.
Huawei a bisa cu a ricibi siguransa pa e ‘decision basa riba evidencia’, mustrando esaki como un victoria. Ehecutivonan a bisa cu 35% di un mercado lo ta un bon resultado pa mayoria di compania.
Huawei ta e top proveedor global di red mobil, y ta considera un alternativa economico y di calidad halto compara cu su rivalnan principal, Nokia di Finlandia y Ericsson di Suecia.
Merca ta bisa cu lidernan comunista Chines por, bou un ley di inteligencia nacional, obliga Huawei pa efectua spionahe cibernetico. Merca a menasa varios biaha di corta lasonan di intercambio di inteligencia cu aliadonan cu uza Huawei.
Cu 5G, oficialnan Mericano ta preocupa pasobra e ‘centro’ lo core extensivamente riba software, lo ta casi imposibel pa detecta un vulnerabilidad accidental of un ‘backdoor’ malicioso entre miyones di linea di codigo di computer. Huawei ta rechasa tur acusacion, bisando cu nunca tin evidencia cu ta responsabel pa un violacion.
Pa Reino Uni, e programa di infrastructura 5G ta considera critico mientras ta bandona UE y tin meta pa posiciona su economia pa beneficia di innovacion tecnologico. Gobierno a bisa ayera cu ta tumando stapnan cu lo permiti pa ‘mitiga e riesgo potencial di e cadena di suministro y combati un variedad di menasa, sea criminal cibernetico of atakenan patrocina pa estado’. E plan ta inclui curasha proveedonan mas chikito, manera Samsung di Sur Korea y NEC di Hapon pa drenta mercado Britanico.
Gobierno lo prepara legislacion pa haci rekisito di siguridad obligatorio. Mientras tanto, oficialnan di siguridad cibernetico lo conseha compania di wireless, algun di cual ya caba a instala ekipo di Huawei capaz pa 5G cu ta excede e limite di 35%, riba con pa cumpli.
Companianan mobil a bisa cu ta analisando e decision. Vodafone, cu ta uza Huawei pa parti di su red di radio pero no den su ‘centro’, a bisa cu uzando diferente proveedor ‘ta e miho manera pa sigura entrega di servicio na tur cliente mobil’.
