E test case entama pa Andin Bikker y Dello Gomeza pa duna tur hende den Reino e derecho di vota pa Tweede Kamer a keda rechasa. Sr. Bikker a indica cu awor lo bay Corte di Derechononan Humano Europeo pa sigui e lucha. Tambe nan kier atende e asunto di e areglo di conflicto (geschillenregeling) na e mesun corte. Asina sr. Bikker ta informa.

Hulandesnan mayor di edad di e paisnan Caribense di Reino awor solamente tin derecho di vota pa eleccion di Tweede Kamer si nan a biba dies aña of mas na Hulanda. Segun sr. Gomez cu esaki ta afecta e principio di igualdad. Habitantenan di Hulanda Caribense (munisipio extraordinario for di 2010) si tin derecho di vota pa Tweede Kamer, pero sinembargo Hulanda Caribense tin un propio orden huridico, e abogado ta rasona, bisando esaki na e fuente Ret Karibense, partner di Bon Dia Aruba.

Sr. Gomes ta haya tambe cu mester considera Conseho di Minister di Reino como legislado, pasobra Conseho di Minister di Reino cu un medida general di gobierno di Reino, mas y mas frecuente ta interveni profundamente den e orden huridico di e paisnan Caribense di Reino. Si por a considera Conseho di Minister como legislado, segun Gomez lo tabata logico si residente di Aruba cu nacionalidad Hulandes tambe haya derecho di vota pa Tweede Kamer.

E pakico di rechasa
Raad van State ta obheta cu Conseho di Minister mirando e autorisacionnan no ta legislado. Votadonan Arubano segun e Conseho tin suficiente posibilidad pa expresa nan preferencia na Eleccionnan di Staten, y e minister plenipotenciario Arubano na Den Haag por influencia decisionnan.

 Asuntonan di Reino
Tambe Conseho di Estado ta skirbi cu tin tiki asunto di reino compara cu asunto interno di e pais Hulanda. Segun nan lo ta bay mucho leu pa duna hende Hulandes di e paisnan Caribense un bos pa Tweede Kamer. Dies aña pasa Conseho di Estado a husga mescos den un caso igual. Esaki tabata e caso unda ministernan Sevinger y Eman a haci e mesun demanda.  For di 10-10-’10 segun Gomes y su abogado partner  y parlamentario Bikker (PDR) hopi a cambia constitucionalmente, ta p’esey nan a dicidi di purba di nobo. E situacion segun nan tambe a cambia momento cu a ‘forsa’ via un protocol di 2015 cu Aruba mester introduci e ley di CAft, sin no lo impone un decreto real. Den e proceso habitantenan di Aruba no tabatin algo di bisa pa cu e constelacion di e Conseho di Minister di Reino riba esaki, cual desde 2012 ta wordo forma door di Tweede Kamer, asina sr. Bikker ta splica.

Sigui cu e lucha
“Di experiencia nos sa cu ora bo haci test case hopi biaha bo no ta logra di biaha y bo tin pa sigui procede (pa habri e mercado di telecomunicacion a procede mas cu 4 aňa”, segun sr. Bikker. “P’esey nos tabata tin speransa cu Raad van State lo a duna un opinion profundo riba e tematica cu Gobierno di Reino ta mete den asuntonan interno mas y mas sin cu habitantenan di Aruba, Corsou y Sint Maarten tin algo di bisa pa cu e constelacion di e organo aki y den ausencia di un geschillenregeling”.